M’cilambo ca Usi mwapali mundu jwine juŵalambilaga Yehofa. Lina lyakwe lyaliji Yobu. Jwaliji jwakusicila mnope soni jwakwete liŵasa lyekulungwa. Jwalakwe jwatendelaga ŵane canasa mwakwakamucisyaga ŵandu ŵakulaga, acakongwe ni ŵanace ŵamasije. Nambo ana Yobu ngamkanasimana ni yakusawusya ligongo lyakuti ŵatendaga yambone?

Yobu nganamanyililaga kuti Satana ŵayiwonaga yosope yaŵatendaga. Yehofa ŵamsalile Satanajo kuti, ‘Ana mtima wenu wuli pa ndumetume jwangu Yobu? Pangali mundu jwakulandana ni jwalakwe pacilambo capasi. Jwalakwe akusambikanila soni akusatenda yindu yambone.’ Satana ŵajanjile kuti, ‘Yisyene kuti Yobu akusiŵapikanila ŵalakwe. Wawojo akusamcenjela soni kumjaliwa. Ampele malo soni yilango yejinji. Agambe kumsumula cipanje cakweco, calece kwalambila.’ Yehofa ŵamsalile jwalakwe kuti, ‘Mpaka mumlinje Yobu. Nambo mkamwulaga jwalakwejo.’ Ligongo cici Yehofa ŵakundile kuti Satana amlinje Yobu? Jwalakwe ŵakulupililaga kuti Yobu caŵepe jwakulupicika.

Kaneko Satana ŵatandite kumlinga Yobu ni yakusawusya yakulekanganalekangana. Candanda, ŵatumisye ŵandu ŵakolanjidwa kuti Asebaya kukumjiŵila Yobu ng’ombe soni acibulu. Kaneko, moto wajocile ngondolo syakwe syosope. Panyuma pa yeleyi, likuga line lya ŵandu lyakolanjidwa kuti Akalideya lyajiŵile ngamila syakwe syosope. Wosope ŵaŵacingaga yilango ya Yobu ŵawulajidwe. Kaneko patendekwe cindu cakusawusya mnope. Ŵanace ŵa Yobu wosope ŵawile nyumba jiŵatendelaga cindimba jili jagwilile. Yobu jwatengwice mnope, nambope nganaleka kumlambila Yehofa.

Nambope, Satana ŵasakaga kuti Yobu alaje mnope, mwamti ŵatendekasisye kuti cilu ca Yobu cosope cikopoce  yilonda yakupweteka mnope. Nambo jwalakwe nganamanyililaga ligongo lyakwe yindu yeleyi yamtendecelaga. Atamose yaliji m’yoyo, jwalakwe jwajendelecele kumlambila Yehofa. Mlungu ŵayiwonaga yosope yayatendekwagayi, soni jwasangalele ni kulupicika kwa Yobu.

Kaneko Satana ŵatumisye acalume ŵatatu kuti akamlinje Yobu. Jemanjajo ŵamsalile jwalakwe kuti, ‘Mtesile cakulemwa ni mkucisisa. Mlungu akumpa cilango.’ Yobu jwajanjile kuti, ‘Iyayi, nganindenda cakulemwa cilicose.’ Kaneko Yobu jwatandite ganisya kuti Yehofa ni jwakutendekasya kuti asimaneje ni yipwetesiyo. Soni jwatite Mlungu ngakumtendela yacilungamo.

Nambope, papali mundu jwine jwacinyamata juŵagambaga kupikanila yaŵaŵecetaga ŵanduwo. Lina lyakwe lyaliji Elihu. Kaneko jwalakwe jwaŵecete kuti, ‘Yosope yaŵecete jemanja yili yaunami. Yehofa ali jwamkulungwa mnope. Jwalakwe ngaŵa mkutenda cakusakala. Akusalola yosope yayikutendekwa soni akusiŵakamucisya ŵandu payakusawusya yawo.’

Kaneko Yehofa ŵatandite kuŵecetana ni Yobu kuti, ‘Ana mwaliji kwapi panapanganyaga kwinani ni cilambo capasi? Ligongo cici mkuŵeceta kuti une ndili jwangali cilungamo? Mkwamba kuŵeceta, nambo ngamkumanyilila ligongo lyakwe yindu yikusatendekwa.’ Yobu ŵajiticisye kulemwa kwakwe ni jwatite, ‘Nalemwisye. Nagambaga kupikana ya wawojo nambo sambano namanyi. Pangali cindu campaka caleme ŵalakwe. Pepani ligongo lya yindu yambeceteyi.’

Satana ali amalisisye kumlinga Yobu, Yehofa ŵampelesoni Yobu cilu cambone soni yindu yejinji kupunda yaŵakwete pandanda. Yobu jwakwete umi welewu soni wakusangalala. Yehofa ŵamjaliwe Yobu ligongo lyakuti jwampikanilaga atamose kuti kutenda yeleyo kwaliji kwakusawusya. Ana mkusaka kuŵa mpela Yobu mwakwendelecela kumtumicila Yehofa atamose mli msimene ni yakusawusya?