Rogo gu ringara nga Uza, kumba adu yo nairiso Yekova. Rimoko angia Eyobo. Ko angia kumukokumuko kumba na dungu aborokporo naadu beko. Ko angia wene sino boro, kini undo airarungo, adekurugbo, na awirinyaure. Ono ya mo pa mangako rurupai aayugo gupai nga kpakaraapai ho berewe ka gbiako te?

Eyobo ainongo ya kerepai nika gbiako te, ono Satana Bakitingbanga aima inoho. Yekova aya fu Satana wẽ: ‘Mo bi gimi moyambu nga Eyobo? Boro ho du wa ko auru kpotosende te. Ko nadegatuko fere na kini mangi rurupai.’ Satana akaragapai nga: ‘Kina rengo du nga Eyobo nairisa ro. Mo nabanda ko na kini fu maku fuko. Mo fu ringara fuko gbiati anya. Mo dinga ha beko, ko nika mbu iriso ro nibasa.’ Yekova aya: ‘Mo ima rengba ka asada Eyobo. Ono ka mo imingo ko ya.’ Tipagine Yekova ambu Satana ti ni ko asadi Eyobo? Ko adu na kido nga Eyobo atinga gu asada re te.

Satana atona ka asada Eyobo na ngbatunga agberãngo ni bakiakia. Ni bambataha, ko akedi aboro du rimoyo nga aSaba i dĩ gako adongi. Fuani, we ki gbarasipa ga Eyobo akandoro dunduko. Gu kura rikaaboro nga aKasado ki dĩ gako akameri. Agu amoyambu naangerafuo agu akameri re i aimiyo kusayo. Gu kura kere gberãngo amangi berewe. Awiri Eyobo dunduko akpi rogo gu bambu i aamanga gayo pumbo rogoho. Eyobo aima du na bakere rungo kpotokoyo, ono ko aambunga iriso Yekova te.

Satana aaida Eyobo rungo ni bakerehe, sidu ko ki kusi aro ti kpotoko naabaha. Eyobo adu rogo  kere igirã. Ko ainongo ndu gupai agi apai re aamanga ko ti ni te. Wa si avura du wo, ko aairiso Yekova kindi. Mbori abi agi apai re dunduko, na ki du na ngbarago be Eyobo.

Fuani, Satana akedi akumba biata i ye ka asada Eyobo. I aya fuko: ‘Si nawira wa ingapai kinaho mo namangihe nga gu mo aigoho. Mbori du nafu mbusa foro.’ Eyobo aya: ‘Mi amanganga gbegberẽpai te.’ Ono ko atona ka berãha nga Yekova du namanga ko na agi apai re, na ko ki pe gupai nga Mbori amanganga fuko wenengai te.

Paranga kumba adu ho nga Eriu naadegatuko kuti gu fugodagbase naadu dagbayo. Sidu, ko afura ki ya: ‘Agu apai oni napehe dunduko ni irairaha. Ani arengbanga ka rugatirani na ga Yekova apai dunduko te. Ko arengbanga ka manga gbegberẽpai te. Ko nabi apai dunduko na kini undo aboro na gayo akpakarapai.’

Fuani, Yekova afura fu Eyobo ki ya: ‘Wari mo adu ni ti gu regbo mi ambakadi ngbangbaturũ na kpotosende? Tipagine mo aya ti ni gbegberẽ boro nga mi? Fugo tigu du ngbaro, ono mo ainongo gupai sa agu apai re si mangi ro te.’ Eyobo aidi gako ingahe ki ya: ‘Mi nga ingahe. Mi aima giapai tipa ro, ono awere mi ini ro nzunzu. Pai ho rengbe ka gasa ro te. Mo mbupai fere tipa gupai mangi mi he.’

Ho gu asada re anyasi ni, Yekova akaraga kpoto Eyobo kubaha na ki fu ahe fuko ni bakerehe susi gu naadu mbata. Eyobo araki ni gbangaha na ngbarago. Yekova afu maku fu Eyobo tipa degatuko fuko zavura ho apai akpakara ni fuko. Ya mo mo nika du wa Eyobo na ki nye kuti iriso Yekova ka akpakarapai vura du wai vurũ?