I Misiri, jubed julwong’o awiya pa Yakobo nia Juisrael. I ng’ei ma Yakobo giku Yosefu githo, Farao mange ucaku bimo. Enwang’u nia nyithindho mir Israel gibenyai man kero migi ubemedere nisagu mi Jumisiri. Farao maeno ugam uketho Juisrael udoko ni ng’eca. Ecaku diyogi nigoyo briki man nitimo tic ma tek mandha mi podho. Re saa ma Jumisiri ubediyo nyithindho mir Israel nitimo tic ma tek, wendgi ubino medere ameda. Calu ma nyai migi ufoyo ngo i Farao, egam eng’olo nia juneg awiya ma co mir Israel ceke saa mi nyoliri migi. Lembuno unyayu lworo lee mandha i nyithindho mir Israel!

Dhaku moko mir Israel ma nyinge Yokebed unyolo nyathin moko ma co ma leng’ mandha. Kara kud juneg nyathin ne, egam eyiko bwati moko ma dit, ekethe i ie man ecidh ekane i kind kolo i dhu kulo Nil. Nyamin nyathin ne ma nyinge Miriam ubedo ceng’ini kude pi nineno wie.

 Kinde ma Nyafarao uloro i kulo pi nijom, e eneno bwati moko ma dit. Saa m’eyabu wie, enwang’u nyathin ubewak i ie; kisa unege lee i kum nyathin maeno. Miriam upenje kumae: ‘Imito acidh asai mego moko ma bipido nyathin ne iri?’ Nyafarao uyio; e ndhundhu, Miriam ucidh ulwong’o Yokebed ma min. Nyafarao uwacu ni Yokebed kumae: ‘Gam nyathin maeni, gwoke ira, man abiculi.’

Saa ma nyathin ne udongo, Yokebed utere i bang’ Nyafarao, man Nyafarao ucaku nyinge Musa. Etunge calu nyathin pare gire. Musa udongo i kal pa Farao, pieno ebino ku copo mi nwang’u gin moko ci m’etie ku yenyne. Ento wie uwil ungo ku Yehova. Eng’eyo nia etie Jaisrael ento etie ngo Jamisiri. Bende, eng’io nitimo ni Yehova.

Kinde ma Musa udoko ku oro 40, enwang’u nia kwayu ekony jupagi. Nindo acel, kinde m’eneno Jamisiri moko ubefodo Jaisrael ma tie ng’eca, egoye bir man enege, ci eyike i kwio. Saa ma Farao uwinjo lembuno, emito eneg Musa cen. Ento Musa uringo i ng’om mi Midian. Kuca, Yehova uwok ugwoke.