I Égiptô, lihaa li Yakôb li bi yoñ jôl le: Lôk Israel. Mbus nyemb Yakôb ni nyemb Yôsep, Faraô nu mondo i bôdôl énél. I bé kon woñi le lipémba li bon ba Israel li nke lel li bon ba Égiptô. Jon Faraô i, i bi yilha bon ba Israel minkol. Faraô i nyégsa bo i bép brik, ni i sal ngandak ikété nwom. Ndi, kiki bon ba Égiptô ba bé kônde lédés bôlô, hala nyen nsoñgi u bon ba Israel u bé ndigi u mbet, bet ni bet. Hala a bi lémél bé Faraô, jon a bi ti oda le ba nol minkéñé mi bon bôlôm nwominsôna mi bon ba Israel. Baa u nla hégda lelaa bon ba Israel ba bi kon woñi?

Muda wada ikété Lôk Israel le Yôkébed, a bééna nkéñé man munlôm u u bé nlam ngandak. Inyu sôñ niñ i man wé, a bi ha nye ikété ngim sel, a sôô nye ipôla bikai bi lom le Nil. Miriam, ngond mañ i Yôkébed, a bé a téé ha bebee, inyu tehe kii y’a bôña.

Ngond Faraô i lo i jogop i lom, a tehe sel, nkéñé man won u ba mu, u eek, a kônôl wo  ngoo. Miriam a bat nye le: ‘Baa me yiñil we muda nu a ga lel man nunu inyu yoñ?’ Ngéda ngond Faraô i bi neebe, Miriam a lona nyañ man nyemede le Yôkébed. Ngond Faraô i kal nye le: ‘Yoñ man nunu, lel nye inyu yem, me mba me saa we.’

Ngéda man a bi nañ, Yôkébed a kena nye yak ngond Faraô, a ti nye jôl le Môsé, a néñés ki nye kiki man wé. Môsé a bi nañ kiki man kiñe, a bé le a bana hiki yom i bé kon nye ngôñ. Ndi kekikel, Môsé a hôya bé Yéhôva. A bé yi toi le a bé man Lôk Israel, ha man Égiptô bé. A bi pohol ki i sélél Yéhôva.

A bana bañ 40 ma nwii, Môsé a kit le a ga hôla litén jé. Ngéda a bi tehe man Égiptô wada a yé bép nkol, u u bé man Lôk Israel, Môsé a bi bép nu man Égiptô ni ngui kayéle a wo. Môsé a bi sôô mim ikété lisege. Ngéda jam li, li bi pam maôô ma Faraô, a bi yéñ njel i nol Môsé. Ndi Môsé a bi so inyu ke i loñ Midian. Yéhôva a bi tééda nye nyoo.