Di Mesir, digoari do pinompar ni si Jakkob bangso Israel. Dung mate si Jakkob dohot si Josep, mamarenta ma raja na baru. Ndang lomo roha ni raja on molo umgogo halak Israel sian halak Mesir. Alani i, disuru ma bangso Israel kerja paksa. Dipaksa do nasida karejo di ladang dohot mambahen batu bata. Alai lam godang do bangso Israel. Alani i, disuru si Firaun ma asa dibunu sude anak ni halak Israel na baru tubu. Boi do dibayangkon ho songon dia pangkilalaan ni halak Israel?

Adong ma borua halak Israel na margoar si Jokhebed. Tubu ma anakna jala uli do rupa ni anakna i. Asa unang dibunu anakna i, dipamasuk si Jokhebed ma anakna i tu karanjang jala ditabunihon ma i di Sunge Nil. Adong do kakak ni pese-pese i na margoar si Miriam. Ibana ma na manjaga adekna i sian na dao.

Ro ma boru ni si Firaun laho maridi tu sunge i. Diida ibana ma karanjang i, jala adong  pese-pese na tangis disi. Gabe asi ma rohana. Ro ma si Miriam tu ibana. Didok ma, ‘Olo do ho molo hujou sahalak ina na boi manusui dakdanak on?’ Olo do boru ni si Firaun i. Diboan si Miriam ma omakna, i ma si Jokhebed. Didok boru ni si Firaun i ma tu si Jokhebed, ‘Boan ma dakdanak on, jala urus ma ibana. Hugaji pe ho.’

Dung balga dakdanak i, dilehon si Jokhebed ma ibana tu boru ni si Firaun. Dibahen ma goarna si Musa. Ala nunga gabe anak ni boru si Firaun si Musa, boi do dipangido ibana manang aha pe. Alai ndang lupa si Musa tu Jahowa, dipillit ibana do manomba Jahowa. Diboto ibana do ndang halak Mesir ibana, alai halak Israel do.

Tingki marumur 40 taon, diurupi si Musa do halak Israel. Tingki diida ibana adong halak Mesir na mamungkuli halak Israel, dipungkul ibana ma halak Mesir i sampe mate. Ditabunihon ma bangkena tu bagas pasir. Dung tarboto i tu si Firaun, naeng dibunu ma si Musa. Alai lari do si Musa tu tano Midian. Disi, sai dijaga Jahowa do ibana.