Sa Ehipto, an pamilya ni Jacob inapod na mga Israelita. Pagkagadan ni Jacob saka Jose, may bagong Faraon na naghadi. Natatakot ini dahil nagigin nang mas dakul asin mas makusog an mga Israelita kisa sa mga Ehipsiyo. Kaya inuripon kan Faraon na ini an mga Israelita. Pinirit niya sindang maggibo nin mga ladrilyo * asin pinatrabaho nin magabaton sa mga tanuman. Pero kan lalong pinapatrabaho nin magabat an mga Israelita, lalo lugod sindang nagdakul. Dai ini nagustuhan ni Faraon, kaya ipinagbuot niyang gadanon an gabos na bagong mundag na lalaking Israelita. Grabe garo an takot kan mga Israelita, ano?

Sarong Israelitang babayi na an pangaran Jocabed an nagkaaki nin sarong guwapitong aking lalaki. Para maprotektaran ini, ibinugtak niya ini sa sarong basket dangan itinago sa haralangkaw na awot, o duot, sa Salog nin Nilo. Sa may harani, nakabantay si Miriam, an tugang kan umboy.

Kan makarigos sa salog an aking babayi ni  Faraon, nahiling kaini su basket. Nahiling niya sa laog an sarong umboy na naghihibi, asin nahirak siya digdi. Naghapot si Miriam: ‘Gusto po nindong maghanap ako nin babaying maataman kan umboy para saindo?’ Kan mag-uyon an aki ni Faraon, inapod ni Miriam an ina niyang si Jocabed. Sinabi kan aki ni Faraon ki Jocabed: ‘Atamanon mo an umboy na ini para sakuya, babayadan taka.’

Kan dakula na an aki, dinara ini ni Jocabed sa aking babayi ni Faraon. Pinangaranan niya ining Moises asin pinadakula bilang sadiri niyang aki. Nagdakula si Moises bilang sarong prinsipe asin puwede niyang makua an gabos na gugustuhon niya. Pero dai nalingawan ni Moises si Jehova. Aram niyang Israelita talaga siya, bakong Ehipsiyo. Kaya pinili niyang maglingkod ki Jehova.

Kan 40 na si Moises, nagdesisyon siyang tabangan an saiyang mga kapwa Israelita. Kan may nahiling siyang Ehipsiyo na pigkukulgan an sarong uripon na Israelita, ginadan niya su Ehipsiyo. Tinambunan ni Moises nin baybay an bangkay kaini. Kan maaraman ini ni Faraon, gusto niyang ipagadan si Moises. Pero nagdulag si Moises pasiring sa Midian. Dai siya pinabayaan ni Jehova duman.