Bas Mesir, keluarga Jakup itandai selaku kalak Israel. Kenca Jakup ras Jusup mate, raja si mbaru si merentah i Mesir, eme Paro. Mbiar ia adi kalak Israel e ndauh gegehen asangken kalak Mesir. Emaka ibanna me kalak Israel jadi budak. Ipaksana kalak e erban batu bata janah jadi budak ku juma. Selain si e, ipaksa kalak Mesir kalak e erdahin, tapi reh buena lalap kalak Israel. Erkiteken si e, isuruh Paro gelah kerina anak dilaki si lahir bas kalak Israel ibunuh. Banci nge ibayangkenndu uga biarna kalak Israel?

Lit sekalak diberu, gelarna Johebet, ia kalak Israel. Mbaru denga ia melahirken anak dilaki si mejile. Ibunikenna anakna e i bas sada keranjang ras tamana ku Lau Nil, gelah ula ibunuh. Kakakna eme Miriam, iikut-ikutna keranjang e i deher lau e nari.

Sanga anak Paro ridi ku lau, idahna keranjang e. Bas keranjang e idahna bayi si sangana ngandung, emaka mekuah atena. Emaka isungkun Miriam ia, ‘Nggit kam ku darami sekalak diberu si banci ngurus anak e?’ Kenca ue nina puteri raja e, ilebuhna mamakna eme Johebet. Dung e nina puteri raja bana, ‘Baba anak enda, rawat ia, kubereken pagi upahndu.’

Kenca nggo cukup umur anak e, ibaba Johebet ia ku puteri raja, iban puteri e gelarna Musa janah iangkatna jadi anakna. Jadi pangeran me Musa janah kai pe atena lit. Tapi la pernah ilupakenna Jahwe. Ietehna maka ia kalak Israel labo kalak Mesir. Emaka Jahwe me si isembahna.

Sanga Musa umur 40 tahun, isampatina atena kalak Israel. Bas sada wari, idahna ipekpeki kalak Mesir kalak Israel, emaka ipekpeki Musa kalak Mesir e seh ngasa mate. Itanemna kalak Mesir e bas kersik. Kenca ibegi Paro kerna si e, ibunuhna atena Musa. Tapi kiam Musa ku taneh Midian. I je ilindungi Jahwe ia lalap.