Didto sa Ehipto, ang pamilya ni Jacob gitawag ug Israelinhon. Pagkamatay ni Jacob ug Jose, bag-o na ang Paraon nga naghari. Nahadlok ang Paraon nga malabwan sa mga Israelinhon ang mga taga-Ehipto. Busa gihimo niyang sulugoon ang mga Israelinhon. Iyang gipugos sila sa paghimog mga tisa, o bricks, ug sa pagtanom. Pero midaghan hinuon ang mga Israelinhon. Nasuko niana ang Paraon maong iyang gipapatay ang tanang bag-ong gipanganak nga lalaking Israelinhon. Seguradong nahadlok gyod ang mga Israelinhon!

Nanganak ug guwapo nga batang lalaki ang Israelinhon nga si Jokebed. Aron proteksiyonan ang bata, iya kining gibutang sa basket ug gitagoan sa kasagbotan sa Suba sa Nilo. Si Miriam, nga igsoon sa bata, naa sa duol ug naniid kon unsay mahitabo.

Naligo sa suba ang anak sa Paraon ug iyang nakita ang basket. Pag-abli niya, iyang nakita  ang bata nga naghilak, ug naluoy kaayo siya. Gipangutana siya ni Miriam: ‘Gusto ba nimong mangita kog moatiman sa bata?’ Misugot ang anak sa Paraon, maong gidala ni Miriam ang iyang inahan nga si Jokebed. Giingnan siya sa anak sa Paraon: ‘Dad-a ug atimana ang bata. Bayran ti ka.’

Dihang midako na ang bata, gidala siya ni Jokebed sa anak sa Paraon nga maoy nagngalan niya ug Moises. Giisip siya sa anak sa Paraon nga samag kaugalingong anak. Nahimong prinsipe si Moises ug iyang makuha ang tanan niyang gusto. Pero wala gyod siya malimot kang Jehova. Nahibalo siya nga Israelinhon siya ug gipili niyang simbahon si Jehova.

Dihang 40 anyos na si Moises, midesisyon siya nga tabangan ang iyang katawhan. Iyang gipatay ug gilubong sa balas ang Ehiptohanon nga nangulata ug Israelinhon. Pagkahibalo sa Paraon, gusto niyang patyon si Moises. Pero miikyas si Moises paingon sa Midian ug gitabangan siya ni Jehova didto.