Murala wa Jakob mfiyelani w’Ejipitu, oziwiwa na nzina na Izrayel. Mukweli José na babe Jakob, Faraó mwina owela vampaddoni. Iyene wela wova wila ana Izrayel anadhe akaane guru wapitta akadda Ejipitu. N’eji Faraó ohawira ana Izrayel adhari. Iyene ohakokela wila akosege mabasa ovadda, mabasa a wuba masizorha vina a olaba mmunddani. Yapadduwa jiji: Ana Izrayel vatabutxiwani vaddiddi, pattabwani winjivana. Vowila Faraó kaziveliwana, iyene ohiruma wila ana alobwana etene abaliwa a nyenye apiwe. Eji yahatxutxa-wene ana Izrayel.

Mw’Izrayel dhahi wakuweliwa Jokebed ombala mwana-mulobwana wokoddela. Omwika mmuddangani odhowa omuttiya nikome na mwinje Nilo wila anapiwe. Murogori wa mwanaya wettaniwa Mariamu wakala vakuvi wi one yafuna opadduwa.

Mfiyeli mwana-wa-muyana wa Faraó, ohona muddangaya. Muturumeleliye mwarimwa, omfwanyamo mwana bagonla, omweddela  ttagaraga. Mariamu onvuza: ‘Munofuna ddautameleleni muyana wi awamwihedheni mwanaya oddo?’ Mwana wa Faraó mwakuleliye kadhowa, Mariamu ottamaga odhowa omwaddela maye Jokebed. Mwana wa Faraó omwaddela dhahi: ‘Kamuttukule mwana oddu omwamwihe ngamala miyo ddinele wupitxa kobiri.’

Munuweli mwanaya, Jokebed ohimperhekela mwana Faraó, odduya ohinvaha nzina na Mizé, omulela ninga waye-waye. Mizé wunuwile ninga mwana-fumu, bagaja dhinfuniye. Mizé kamudduwalile Yehova. Iyene wahiziwa wila wali mukadda Izrayel ottiya mukadda Ejipitu. Nona wahisakula omwebedha Yehova.

Mukaneliyena vyaka 40, Mizé ohisakula okamihedha nlogo naye. Siku nimodha Mizé omoona mukadda Ejipitu baganvada mw’Izrayel, Mizé bagafuna wi àvunele omvada mukadda Ejipituya mpaka ompa. Mizé otibela muruttuya vamutxesani. Faraó muziweliye, ohitamela ompa Mizé. Nomala Mizé ohittawela elabo ya akadda Midia. Wamukoyile ddi Yehova.