Ke Egypt, ẹkekot ubon Jacob nditọ Israel. Ke Jacob ye Joseph ẹma ẹkekpa, Pharaoh en̄wen ama ọtọn̄ọ ndikara Egypt. Enye ama ekere ke nditọ Israel ẹmọn̄ ẹdibọ mmimọ itie, ntre enye ama anam mmọ ẹdi ifịn. Enye ama enyịk mmọ ẹnam brik ẹnyụn̄ ẹnam ọkpọsọn̄ utom ke in̄wan̄. Edi nditọ Israel ẹkedọdiọn̄ ẹwak kpa ye ofụri ufen oro. N̄kpọ oro ama afịna Pharaoh. Ntre enye ama ọdọhọ yak ẹwot kpukpru nsek nditọ irenowo emi iban Israel ẹmande. Ekere ke eketie nditọ Israel didie ke idem?

Eyen Israel kiet emi ekekerede Jochebed, ama aman ata ediye eyen erenowo. Sia enye mîkoyomke ẹwot eyen esie, enye ama esịn enye ke akpasa emen ekedịp ke otu nnyanyan̄a ke Akpa Nile. Eyeneka eyen oro, Miriam, ama ada ekpere ese se iditịbede.

Ke ini adiaha Pharaoh ekedide ndiyere mmọn̄ do, enye ama okụt akpasa oro ye nsekeyen ke esịt, ke atua. Mbọm eyen oro  ama anam enye. Miriam ama edibụp enye ete: ‘Ndi n̄ka n̄kokot edepeyen emi edikemede ndikama eyen emi nnọ fi?’ Adiaha Pharaoh ama ọdọhọ enye aka okokot. Miriam ama okokot Jochebed eka esie edi. Adiaha Pharaoh ama ọdọhọ Jochebed ete: ‘Men eyen emi kakama nọ mi. Nyekpe fi okụk.’

Ke eyen oro ama okokpon, Jochebed ama emen enye ọsọk adiaha Pharaoh. Adiaha Pharaoh ama osio enye Moses, onyụn̄ ada enye nte eyen esie. Ẹkebọk Moses nte eyen edidem, enye ama onyụn̄ enyene se ededi emi enye oyomde. Kpa ye oro, Moses ikefreke Jehovah. Enye ama ọdiọn̄ọ ke imọ idịghe eyen Egypt, ke idi eyen Israel onyụn̄ emek ndikpono Jehovah.

Ini Moses edide isua 40, enye ama ebiere ndin̄wam mbon mmọ. Ke ini enye okokụtde nte eyen Egypt amiade eyen Israel, enye ama amia eyen Egypt oro ata idiọk idiọk; eyen Egypt oro ama akpa. Moses ama emen okpo esie edịp ke ntan. Ke ini Pharaoh okokopde n̄kpọ emi, enye ama oyom ndiwot Moses. Edi Moses ama efehe aka Midian. Jehovah ama ese aban̄a enye do.