Magsch dich erinnere, dass d Familie vom Jakob uf Ägypte isch go wohne? Z Ägypte wird die Familie immer grösser und mer seit ihne Israelite. Wo de Jakob und de Joseph gstorbe sind, fangt en neue Pharao a regiere. Wo er gseht, dass d Israelite immer meh werded, chunnt er Angscht über, dass si plötzlich stärcher chönnted werde als d Ägypter. Drum macht er d Israelite zu Sklave. Si müend en Huufe Bachstei mache und ganz vil uf em Feld schaffe. Aber sin Plan gaht nid uf, es git immer no meh Israelite. Das gfallt em Pharao gar nid. Er befihlt, dass alli Buebe, wo frisch uf d Welt chömmed, müend tötet werde. Chasch du dir vorstelle, wie schlimm das für d Israelite isch?

D Jochebed, en Israelitin, chunnt es herzigs Baby über. Wil si nid wett, dass ihre Bueb stirbt, leit si ihn in en Chorb ine und versteckt de Chorb im Nil zwüsche em Schilf. D Mirjam, di grossi Schwöschter vom Baby, bliibt i de Nöchi, zum Luege, was passiert.

Wo d Tochter vom Pharao im Fluss badet, gseht si plötzlich de Chorb. S Baby im Chorb isch am Brüele und es tuet ihre sehr leid. D Mirjam fragt: «Söll ich e Frau go hole, wo zu dem Baby cha luege?» D Tochter vom Pharao findet das e gueti Idee und drum holt d Mirjam ihri Muetter, d Jochebed. Nachher seit d Tochter vom Pharao zu ihre: «Nimm s Baby und tues für mich stille. Ich zahle dir öppis defür.»

Wo de Bueb gnueg alt isch, bringt ihn d Jochebed wider zu de Tochter vom Pharao. Er wird für si wie en eigete Sohn und si git ihm de Name Moses. Er wachst jetzt als Prinz uf und cha drum alles ha, wo er wett. Trotzdem vergisst de Moses Jehova nie. Er weiss, dass er en Israelit isch und eigentlich kei Ägypter. De Moses entscheidet sich für Jehova.

Wo de Moses 40i isch, gaht er sim Volk go helfe. Einisch gseht er, wie en israelitische Sklav vomene Ägypter zämegschlage wird. Uf das abe schlaat de Moses de Ägypter eso fescht, dass er stirbt. Und denn versteckt er ihn im Sand. De Pharao findet das use und wett de Moses umbringe. Drum flüchtet de Moses uf Midian. Au dört luegt Jehova für ihn.