Israeliita münüshii na nüikeyuukana Jacob chaiwaʼaya naya Egipto. Outapa Jacob nümaa José, aikalaashi sünain aluwatawaa wanee faraón jekechi. Mmotshi faraón süka nawainmalaain na israeliitakana noulia na egipciokana. Nüchepchiaka naya. Niʼyateʼerüin maʼin naya otta naainjirüin ladrillo. Mayaapejeʼe müliain maʼin naya natuma na egipciokana, akooʼomüinraashii maʼin naya. Shiasaʼa sutuma mojuin tia nümüin faraón, nuʼutiraka naaʼin na joʼuu tooloyuuchein eekai israeliitain, naya kataka oʼu na jieyuucheinkana. Mmotkajasaʼa maʼin na israeliitakana, ¿aashimüin?

Eejatü wanee israeliita Jokébed sünülia, kachonsü shia wanee joʼuu toolochon. Shiʼitaain nia suluʼu wanee kanaasüta jee suunjulaka nia pasanain sünain suuʼulia kainyaruushi, shiroku tü süchikat Nilo. Eejatü wanee nuwala, Míriam sünülia, shiʼraja aaʼuchi nia süpüla sütüjaain saaʼu kaseerüin alatüin nümüin.

Suʼunaka nüchon faraón sünain oʼoojoo shirokumüin tü süchikat, shiʼraka tü kanaasütakat. Yalajachika chi joʼuukai aʼyalajüin süpüla, sümülialaaka saaʼin naalin. «¿Jamüsü saaʼin pümüin  tasaajüle wanee wayuu süpüla sutujeʼerüin nia?», sümaka Míriam sümüin. Susoutakalaka nüchon faraón: «Püsaaja maala». Süsaajaka Míriam nii chi joʼuukai. Sümaka nüchon faraón sümüin Jokébed: «Pümaa chi joʼuukai, pipija nia, tawalaajeerü pia».

Miyoʼupa chi joʼuukai, shiʼikajaaka nia Jokébed sümüin nüchon faraón. Moisés nünülia sutuma nüchon faraón, shipijain nia maʼaka naaʼin wanee süchon. Nülüinshi nia chi aluwataashikai, eesü süpüla nümaʼanain kasa eeka eein. Nnojoipejeʼe motuin nia naaʼin Jeʼwaa. Nütüjaa aaʼu Moisés israeliitain nia, nüneekaka niʼyataainjachin nümüin Jeʼwaa.

Wanaa sümaa nükaaliinjain Moisés na israeliitakana, 40 nuuyase. Soʼu wanee kaʼi, niʼrüin wanee egipcio sünain aʼyaajaa wanee israeliita. Nüsheʼetaka Moisés emetutshaata chi egipciokai, outaleeka nia nutuma, nojoitaka nia. Naapapa faraón süchiki tia, nuʼutee aaʼinchi Moisés. Nuʼunaka Moisés eemüin wanee mma Madián münüsü. Naaʼinmajaka nia Jeʼwaa chayaa.