MoEngipte, eṱunḓu raJakob ra katjiukwa otjOvaisrael. Jakob na Josef tji va za nokuṱa, Farao omupe wa uta okuhonapara. Eye aa tira kutja Ovaisrael mave rire ovanamasa tjinene pOvaengipte. Okutja Farao ngwi, otja tjita kutja Ovaisrael ve rire ovakarere. Eye we ve ṋiṋikiza kutja ve ungure ozohima nokuungura oukukutu momahi womakunino. Posiya otja Ovaengipte paave ve ṋiṋikiza okuungura oviungura ovizeu, Ovaisrael opaave ririre ko ovengi. Mena rokutja Farao kaa tjaterwa i otjiṋa hi, eye wa rakiza kutja ounatje auhe ouzandu wOvaisrael mbwa zu nokukwatwa u zepewe. Ripura uriri kutja Ovaisrael va ri nemuma pu pe ṱeki pi!

Omukazendu Omuisrael wena Jokebed wa ri nokanatje okazandu okawa. Mena rokuvanga okutjevera okanatje ke, eye we ketwa mokambamba ne kehoreke momahozu wOnḓonḓu Nil. Okaṱena kokazandona nga kena Mirjam, ka ri popezu okutarera kutja mape tjitwa tjike ku ko.

Omuatje waFarao omukazona we yekurikoha monḓonḓu na munu okambamba. Mokambamba  nga wa vaza mo okazandona kaake riri, nekeṱire ondjenda. Mirjam wa pura na tja: ‘Hi kekupahere omukazendu ngu me ku nyamisisire okanatje?’ Indu omuatje waFarao tja tja ii, Mirjam wa kaeta ina Jokebed. Omuatje waFarao omukazona wa tja ku ye: ‘Toora okanatje nga u kendji nyamisisire nami me ku sutu.’

Indu okanatje tji ke kura, Jokebed we ke eta komuatje waFarao omukazona, neye we mu ruka Moses nekekurisa otjokanatje ke omuini. Moses we kura otjomuatje wombara nu atja yenena okumuna otjiṋa atjihe tjaa vanga. Posiya Moses kena pa zemba Jehova. Eye aa tjiwa nawa kutja wa ri Omuisrael nu kamu Engipte. Neye wa toorora okukarera Jehova.

Moses tja ri nozombura 40, eye wa tya okuvatera Ovaisrael ovakwao. Moses tja muna Omuengipte ama tono Omuisrael, eye wa tona Omuengipte nomasa nga tja zepa. Moses wa sira orutu rwOmuengipte ngo mehi. Indu Farao tja zuva, eye wa kondja okuzepa Moses. Posiya Moses wa tupuka nai kehi raMidian. Jehova we mu ṱakamisa.