Ba menua Ejip, ruang bilik Jakop dikumbai orang Israel. Pengudah pemati Jakop enggau Josep, Raja baru berengkah merintah. Iya irau orang Israel deka nyadi kering agi ari orang Ejip. Nya alai, Raja tu nyadika orang Israel ulun. Iya mejal sida ngaga batu-bata sereta ngereja pengawa ti berat ba umai. Majak agi orang Ejip mejal orang Israel bebendar agi gawa, majak agi orang Israel nambah-menambah. Tang Raja begedika nya, lalu ngasuh semua anak mit lelaki orang Israel ke baru ada dibunuh. Ulih nuan ngambarka asai takut orang Israel maya nya?

Seiku indu Israel ke benama Jokibit ngadaka anak lelaki ti manah amat gamal. Kena nyelamatka iya, Jokibit nyimpan anak iya dalam bakul lalu ngelalaika bakul nya ba rumput ti panjai Sungai Nile. Menyadi indu anak mit nya, Miriam, nganti semak bakul nya.

Anak indu Raja nurun deka mandi ngagai sungai lalu tepedaka bakul nya. Iya meda seiku  anak mit ke nyabak dalam bakul. Iya sinuka anak mit nya. Miriam nanya: ‘Patut aku ngiga seiku indu ke ulih nusuka anak mit tu ke nuan?’ Lebuh anak indu Raja nyaut au, Miriam mai indai iya, Jokibit. Anak indu Raja madah ngagai Jokibit: ‘Bai anak mit tu, lalu nusuka iya ke aku. Aku deka mayar nuan.’

Lebuh anak mit nya udah besai, Jokibit mai iya ngagai anak indu Raja, ke meri iya nama Moses lalu ngemesaika iya baka anak iya empu. Moses mansang besai nyadi anak raja lalu ulih ngulihka semua utai ti dikedekaka iya. Tang, Moses seruran ingatka Jehovah. Iya nemu iya orang Israel, ukai orang Ejip. Nya alai, iya milih deka nyembah Jehovah.

Lebuh iya beumur 40 taun, Moses mutuska deka nulung orang Israel. Maya iya meda seiku orang Ejip malu seiku orang Israel, Moses malu orang Ejip nya enggau balat nyentukka orang nya mati. Moses ngelalaika bangkai nya dalam pasir. Lebuh Raja nemu pasal tu, iya nguji deka munuh Moses. Tang, Moses ngerarika diri ngagai menua Midian. Jehovah nyaga iya ba menua nya.