LEKSION 17
Pinili ni Moises ti Agdayaw ken Jehova
Idiay Egipto, naawagan iti Israelita ti pamilia ni Jacob. Idi natayen da Jacob ken Jose, nagturay ti baro a Faraon. Mabuteng ni Faraon ta nabilbilegen dagiti Israelita ngem kadagiti Egipcio, isu a pinagbalinna ida nga adipen. Pinilitna ida nga agaramid iti ladrilio (bricks) ken agtrabaho iti talon. Ngem bayat a padpadagsenen dagiti Egipcio ti trabaho dagiti Israelita, lallalo met nga umad-aduda. Saan a kayat ni Faraon nga umaduda, isu nga imbilinna a mapapatay ti amin a mayanak nga Israelita a lallaki. Ania ngata ti narikna dagiti Israelita?
Maysa nga Israelita nga agnagan Jocabed ti nangyanak iti ubing a lalaki. Makaay-ayo ti itsura ti ubing. Tapno maprotektaranna ti anakna, inkabilna iti basket sa inlemmengna kadagiti mula iti Karayan Nilo. Nagyan ni Miriam a manang ti ubing iti asideg tapno kitaenna ti mapasamak iti adingna.
Napan ti anak a babai ni Faraon iti karayan tapno agdigus ket nakitana ti basket. Idi linuktanna, nakitana ti ubing nga agsangsangit ket naasian. Insaludsod ni Miriam: ‘Kayatyo a
mangbirokak iti babai a mangaywan iti ubing para kadakayo?’ Idi nagwen ti anak a babai ni Faraon, inayaban ni Miriam ni nanangna a Jocabed. Kinuna ti anak a babai ni Faraon ken Jocabed: ‘Alaem daytoy nga ubing ken aywanam para kaniak ket bayadankanto.’Idi dakkelen ti ubing, impan ni Jocabed iti anak a babai ni Faraon. Pinanaganan ti anak a babai ni Faraon ti ubing iti Moises ken pinadakkelna kas bukodna nga anak. Dimmakkel ni Moises kas maysa a prinsipe ket maalana ti amin a kayatna. Ngem saanna a nalipatan ni Jehova. Ammona nga isu ket maysa nga Israelita, saan nga Egipcio, ken pinilina ti agserbi ken Jehova.
Idi agtawen ni Moises iti 40, pinadasna a tulongan dagiti padana nga Israelita. Idi nakitana a kabkabilen ti maysa nga Egipcio ti maysa nga adipen nga Israelita, pinatayna ti Egipcio sa inlemmengna iti kadaratan. Naammuan dayta ni Faraon ket kayatna a patayen ni Moises. Ngem naglibas ni Moises a napan iti daga ti Midian ket inaywanan ni Jehova sadiay.
“Gapu iti pammati ni Moises, . . . saanna a kayat ti maawagan nga anak ti balasang ni Faraon, ta pinilina ti mamaltrato a kadua ti ili ti Dios.”—Hebreo 11:24, 25