ETUKULWA 17
Moses okwa li a hoolola okulongela Jehova
Eshi oukwaneumbo waJakob wa li muEgipti, owa li hau ifanwa Ovaisrael. Konima eshi Jakob naJosef va fya, Ovaegipti ova li va hovela okupangelwa komupangeli mupe. Omupangeli keshe waEgipti okwa li ha ifanwa Farao. Farao oo okwa li a tila kutya Ovaisrael otava ka ninga ovanaenghono ve dule Ovaegipti. Onghee hano, okwa li a ninga Ovaisrael ovapika. Okwa li e va fininika va folome eedopi nova longe noudiinini momapya. Ashike nande ongaho, Ovaisrael ova li va twikila okuhapupala nonande ova li tava hepekwa kOvaegipti. Molwaashi Farao ka li a hafa eshi Ovaisrael tava hapupala, okwa li a yandja elombwelo kutya ouhanana aveshe voumati ovo tava dalwa kOvaisrael nava dipawe. Ovaisrael kava li tuu va tila!
Omukainhu umwe Omuisrael wedina Jogebed okwa dala okaana okamati kawa. Opo e ka amene, okwa li e ka tula moshimbaba ndele te ka holeke momulonga waNil. Omumwainakadona wokamati oko wedina Miriam, okwa li ha kala popepi opo a tale kutya oshike tashi ningilwa okaana.
Efiku limwe, okamonakadona kaFarao oka li keke likosha momulonga ndele taka mono oshimbaba. Moshimbaba omo okwa li ka hanga mo okaana taka kwena, noka li ke ka etela onghenda. Miriam okwa li a pula ta ti: ‘Ino hala ndi ku kongele omukainhu oo ta dulu oku ku nyamifila okaana?’ Eshi okamonakadona kaFarao ka dimina, Miriam okwa li a eta ina Jogebed. Okamonakadona kaFarao oka li ka lombwela Jogebed ka ti: ‘Tambula okaana aka u ka nyamifile nge, ohandi ke ku futa.’
Eshi okaana ka kula, Jogebed okwa li e ka twala kokamonakadona kaFarao, ndele take ka luku Moses noku ka tekula onga omona wako. Moses okwa kula e li onga omona wohamba nokwa li ta dulu okukala e na keshe osho a hala. Ndele nande ongaho, ka li a dimbwa Jehova molwaashi okwa li e shii kutya ye Omuisrael ndele ke fi Omuegipti. Okwa li yo a hoolola okulongela Jehova.
Eshi Moses a wanifa omido 40, okwa li a tokola okukwafela oshiwana shavo. Okwa li a mona Omuegipti ta denge omupika Omuisrael, opo nee Moses okwa hovela okudenga Omuegipti ndele ta fi noku mu holeka medu. Eshi Farao a uda oshinima osho, okwa li a hala okudipaa Moses, ashike Moses okwa li a ya onhapo kuMidian. Jehova okwa kala ta file oshisho Moses.
‘Meitavelo Moses okwa anya a ifanwe omona wokakadona kaFarao, okwe lihoololela, a hepekwe pamwe noshiwana shaKalunga.’ — Ovaheberi 11:24, 25
Otashi dulika yo u hafele oikundafanwa ei
OSHUNGONANGELO
Moses okwa li lyelye?
Omulumenhu oo omudiinini okwa fimanekwa neenghono kOvakriste, kOvajuda kOvamoslema nosho yo kuvamwe. Ou shii shike kombinga yaye?
