Mu ixi ia Ijitu, o muiji ua Jakobo eza ku u uijiia mu dijina dia akua Izalaiele. Kioso Jakabo ni Zuze kiafu, kueza Falaó iéngi ia kexile mu tumina. Muene ua kexile ni uôma ua kuila akua Izalaiele a di bhanga kifuxi kia dikota, akua Ijitu ndenge. Mu kiki, Falaó ua bhangesa akua Izalaiele kukituka abhika. Muene ua a jijidika kubhanga jindobhi ni kukalakala kiavulu mu mábhia. Akua Ijitu akexile mu talesa hadi iavulu ku akua Izalaiele, maji né kiki akua Izalaiele akexile mu dibandekesa dingi. Falaó ka sangulukile, mu kumona kiokio muene ua tumu kuila kana koso ka diiala mukua Izalaiele a tokalele ku ka jibha mu kithangana kia ku ka vuala. Mu kuívua kiki, akua Izalaiele akexile ni uôma uavulu.

Sai muhatu a mu ixanene Jokebede, ua vuala kana ka diiala. Phala ku ka langa, ua ka te mu kaxa iu ua ka sueka mu kaxi ka dibu bhu mbandu ia honga ia ngiji ia Nilu. O phange ia kamona, Midiiana, uemanene, ua kexile kadikanga phala kumona ioso ieji bhita.

 O mon’â muhatu ua Falaó uai mu ngiji phala kuzoua, iu ua mono o kaxa. Mu ku i jikula ua mono kamona ka kexile mu dila, henda ia mu kuata. Midiiana ua muibhula: ‘Ngiia mu sota muhatu u tena kua muisa o mona?’ Kioso o mon’â Falaó kia xikina, Midiiana uai mu takana manh’â Jokebede. O mon’â Falaó ua muambela: ‘Ambata o kana kaka, ngi muamuisile-ne, nga-nda ku futa.’

Kioso o mon’â kia kulu, Jokebede ua mu bheka kua mon’â Falaó. O mon’â Falaó ua mu luku o dijina dia Mozé, ua mu sase kala mon’ê. Mozé uexile kifua kilamba, ua tenene kukala ni kima kioso-kioso kia-ndalele. Maji Mozé ka jimbile Jihova. Muene uejiidile kiambote kuila uexile mukua Izalaiele, kexile mukua Ijitu. Muene ua solo kusidivila Jihova.

Mu kitala kia 40 a mivu, Mozé ua banze kukuatekesa o mundu uê. Kioso muene kia mono diiala mukua Ijitu ua kexile mu beta mubhika mukua Izalaiele, Mozé ua beta o diiala mukua Ijitu katé kia mu jibha. Mozé ua sueka o kimbi mu museke. Kioso Falaó kieza mu kuijiia, muéne ua soto kujibha Mozé. Maji Mozé ua lengela mu ixi ia Midiiana. Jihova ua mu tambula konda.