E Misiri, ab’eka ya Yakobo mubaminywa mw’Abaisraeli. Yakobo na Yozefu babere babiriholha, owundi Farao mwatsuka erithabalha. Mwasagha athi Abaisraeli balimuthunga obuthoki bunene kwilhaba Abanya Misiri. Neryo Farao oyu mwakolha Abaisraeli mw’abakobe. Mwabakaka erikolha amatafali n’erikolha kutsibu omwa malima. Aliwe Abanya Misiri ibakabya bakongera eribakaka erikolha kutsibu, Abaisraeli nabu ibongera erikanya. Neryo kundi Farao mwathanza ekyo, mwalhaghira athi esyomekeke esyosi sy’obulhume esikabuthawa esy’Abaisraeli sithawe. Wukalengekanaya eki muk’itha Abaisraeli b’obuba bungahi?

Omukali Omuisraeli oyukahulhawamu Yokebedi mwabutha omwana w’obulhume oyuwene. Erithoka erimutheya, mwamuhira omwa kali nga kasero, amakabisa omwa bighorwe okwa Lhusi Nili. Mwali w’obu lhumekeke olho, ya Miriamu, mwabya iniane hakuhi erilebya ekikendibya.

 Mwali wa Farao mwasa erisyoghera okwa lhusi, neryo amalhangira akasero ako. Mweya mw’olhumekeke ilhune mulira, neryo amalhukwira obulighe. Miriamu mwabulya athi: ‘Nganayakusonderaye omukali oyuwanga kulemberera omwana oyu?’ Mwali wa Farao abere ikirirya, Miriamu amaletha mama wiwe owenyine-nyine, ya Yokebedi. Mwali wa Farao mwamubwira athi: ‘Wimaye omwana oyu, wunyiremberereyo, ngendi syakuthuha.’

Omwana abere abirikulha, Yokebedi mwamulethera mwali wa Farao, oyuwamulhukamu Musa neryo amamukulya ng’omwana wiwe. Musa mwakulha ng’omunya mwami kandi iniakathunga ekyosi-kyosi eky’anzire. Aliwe Musa mwath’ibirirwa Yehova. Abya inianasi ngoku ni Muisraeli, butsira Munya Misiri. Neryo mwathwamu erikolera Yehova.

Abere ahikya myaka 40, Musa mwathwamu eriwathikya abandu babu. Abere akalhangira Omunya Misiri akaswirya omukobe Omuisraeli, Musa mwaswirya Omunya Misiri oyo neryo amaholha. Musa mwamuthaba omwa museghe akamubisa. Farao abere akaminya, mwanza eritha Musa. Aliwe Musa mwathibitha omwa kihugho kye Midiani. Yehova mwamuwathikya inian’eyo.