Yuŋgu Chekɔpu wo ndaa veelu o Ichipi niŋ ni aa Isɔluɛiya. Mɛɛ Chekɔpu nda Choosɛ vi, mi Felo cheleŋ simnuŋ masaa. Masaa hoo wa siooŋnde maa Isɔluɛiya wa kuiyo ma hiau waŋnda Ichipi. Le hei, mi Felo siiŋguu Isɔluɛiya chiaa. Mbo baŋ nda le kpilikioŋ lɔɔ, vɛlɛ a wallo tosaa kalaŋ o chiɔɔŋ ndaŋ niŋ. Kɛ mɛɛ waŋnda Ichipi wa Isɔluɛiya baŋɔɔ le wallo tosaa kalaŋ yɛ, lende koni nda wa hiouwɔɔ lachi a kuiyo ni. Felo ndoo hɛnaŋ a keŋ kposoŋ te. Le hei, mbo duau sawaa maa te Isɔluɛiya velu pɛ wana pɔnɔɔ, a dii ndu. Yiyaŋndɔ mɛɛ kpɛ Isɔluɛiya wa a siooŋnde yɛ!

Wana lanɔ Isɔluɛinɔ pilɛ wa diolaŋ aa Chochɛbɛdi. Mbo vialu poombɔ kɛndɛ kɛndɔɔ. Le ndu chiindiaa, mbo wou ndu o kambɛiyo niŋ, okoŋ mbo kɔ vioŋ ndu o billo niŋ o Pioo Nail. Mi yemaa poombɔɔ hoo diolaŋ aa Meeliam, kɔ sim ikɛi le chɔɔ nyɛ cho poombɔɔ yɔŋnɔŋndo.

Mɛɛ chua Felo wo hiŋ pulɔŋndo o pee koŋ, mbo cha kambɛi koŋ. Mɛɛ o nua leniŋ, mbo cha  poombɔɔ chaŋndo. Mi mɔnɛi bii ndu le ndu. Mi Meeliam nyuna ndu aa: ‘I kɔ nuuvial num waŋndo mbo mandal num ndu?’ Mɛɛ chua Felo wo chɛl, mi Meeliam kɔ huŋ a kala ndɔ Chochɛbɛdi. Mi chua Felo wo dimul ndu aa: ‘Chua poombɔɔ hoo ma mandal la ndu, I cho num paawa.’

Mɛɛ poombɔɔ simnuŋ kpasu, mi Chochɛbɛdi kua a ndu naa chua Felo wo chua. Mi chua Felo wo ke ndu diolaŋ aa Muuse, nduyɛ mbo manda ndu maa po ndɔ. Mi Muuse hindu mbo simnuŋ po masaa. Nyɛ o nyɛ ndoo yeema pɛ, sɔlaa ndoo sɔla ni. Kɛ Muuse puɛɛnuŋ a Chɛhowa le. Mbo sina kɛsɛ maa Isɔluɛinɔɔ o wa ni, kɛ o ve Ichipinɔ le. Nduyɛ, mbo kɛɛsiaa le Chɛhowa piɛiyo.

Mɛɛ Muuse fuuluu wɔsilaŋ 40, mbo kɛɛsiaa le wanaa nduaa malaa. Paale pilɛ, mɛɛ Muuse che Ichipinɔɔ Isɔluɛinɔɔ lɔɔ, mbo luaa Ichipinɔ koŋ lɔɔ pila, nduyɛ mbo dii ndu. Mbo chua dialuŋ ndɔŋ, mbo kɔ vioŋ o siooŋnde niŋ. Mɛɛ Felo tuei a hei okɔɔ, mbo yeema le Muuse diyɔɔ. Kɛ mi Muuse nyaanuŋ o lɛŋnde Midiaŋndeŋ niŋ. Naa Muuse nyaanuŋ nda bɛɛ, Chɛhowa wa a ndu latulu.