Mwa Egepita, lubasi lwa Jakobo nelukalile kubizwa kuli Maisilaele. Jakobo ni Josefa hase bashwile, kwakala kubusa Faro yomunca. Naaikalezwi kakuli Maisilaele neli babañata hahulu mi nebanani maata kufita Maegepita. Kacwalo, Faro aeza Maisilaele kuba batanga. Abahapeleza kueza litina ni kubasebelisa ka taata mwa masimu. Kono Maegepita niha neba bahapeleza kubeleka ka taata cwalo, palo ya Maisilaele neizwelapili kuekezeha ni kuata mwa naha. Faro naasika tabiswa ki taba yeo, kacwalo alaela kuli bana babashimani kaufela ba Maisilaele bane bakapepwa babulaiwe. Munahane feela sabo yene babile ni yona Maisilaele!

Musali wa Muisilaele yabizwa Jokebedi apepa mwana wamushimani yomunde. Kuli asileleze mwanaa hae, amubeya mwa sizuma ni kuyo sipata mwa mataka a mwa Nuka ya Nile. Kono kaizelaa mbututu yeo, ili Miriame naayemezi kwahule kuli abone sesika ezahala.

Mwanaa Faro wamusizana hashetumukela kwa Nuka ya Nile kuyo tapa, abona sizuma. Hakwahulula sizuma seo, afumana mwateñi  mbututu yenesweli kulila mi aishwela makeke. Miriame amubuza kuli: ‘Kana watabela kuli niye, niyo bata musali kuli akuanyiseze mwana yo?’ Mwanaa Faro hasaalumezi, Miriame atisa mahe kasibili, yena Jokebedi. Mwanaa Faro wamusizana kihaa li ku musali yo: ‘Uye ni mbututu yo, unianyiseze yena, mi nika kulifa.’

Mwana yo hasaahulile, Jokebedi amukutisa ku mwanaa Faro wamusizana, mi amubeya libizo la Mushe ni kumuhulisa sina mwanaa hae wa kuipepela. Mushe ahula sina mwanaa mukwae mi naakona kuba ni lika kaufela zanaabata. Kono Mushe naasika libala Jehova. Naaziba kuli neli Muisilaele luli isiñi Muegepita. Mi naaiketezi kusebeleza Jehova.

Hanaali wa lilimo ze 40, Mushe naaikatulezi kutusa sicaba sahae. Hanaaboni Muegepita inze anata Muisilaele, Mushe anata hahulu Muegepita yo kuli mane ashwa. Mushe apumbeka situpu seo mwa lishabati. Faro hanaautwile taba yeo, abata kubulaya Mushe. Kono Mushe asabela kwa naha ya Midiani. Jehova azwelapili kumubabalela kwa sibaka kwanaaile.