Mu Edipito, kisaka kya Yakoba kyāyukene bu Isalela. Ba Yakoba ne Yosefa pa kufwa, Felo mupya wāanza kuludika. Wādi utyina’mba bene Isalela bakekala bakomo bininge kupita bene Edipito. O mwanda uno Felo wāmunine bene Isalela bupika. Kāebafwatwija bidiki ku bukomo ne kwibengidija mingilo mikomo mu madimi. Inoko bene Edipito pobādi bengidija bene Isalela mingilo ku bukomo, po pene bene Isalela bāvudila’ko bininge. Felo byākadipo usaka bavudile’ko, wāsoñanya bepaye bana bonso bana-balume bene Isalela babutulwa. Fwatakanya’po mwāzakedile bene Isalela!

Mwana-mukaji umo mwine Isalela, wa dijina dya bu Yokebedi, wābutwile mwana mwana-mulume muyampe. Pa kusaka kumupandija, wāmutūla mu kakisaku, wākamufya mu mabungu mu Munonga wa Nile. Midiamu, kaka wandya uno mwana wa lukeke wāshikata kufula umulama.

Mwanā Felo mwana-mukaji pa kwiya koya ku munonga, wāmona kano kakisaku.  Munda’mwa wātana’mo mwana wa lukeke udila, wāmukwatyilwa lusa. Midiamu wāmwipangula’mba: ‘Le nkakukimbile mwana-mukaji wa kukwamishisha’ye?’ Mwanā Felo pa kwitabija, Midiamu wākamuselela Yokebedi, inandya mwana wa lukeke’wa. Mwanā Felo mwana-mukaji wāmulombola’mba: ‘Sela uno mwana, uñamishishe’ye, nsa kukufuta.’

Uno mwana pa kutama, Yokebedi wākamujokeja kudi mwanā Felo mwana-mukaji, wāmwinika bu Mosesa ne kumulela pamo bwa wandi mwana. Mosesa wātamine bu mwanā mulopwe kadi wādi na byonso byasaka. Inoko Mosesa kāidilwepo Yehova nansha dimo. Wēyukile’mba i mwine Isalela, ke mwine Edipitopo. Kadi wātongele kwingidila Yehova.

Mosesa paābwenye myaka 40, wātonga kukwasha bantu bandi. Difuku dimo wāmona mwine Edipito ukupila umpika mwine Isalela, Mosesa wākupila mwine Edipito bininge wāmwipaya. Mosesa wāfya umbidi wandi mu musenga. Felo pa kuyuka uno mwanda, kākimbe kwipaya Mosesa. Mosesa wānyemena ku ntanda ya Midyana. Yehova wāmukwatakenye kwine’kwa.