ËXPËJKËN 17
Moisés yëˈë wyinˈijx tmëdunäˈänyë Jyobaa
Mientrësë nety tsyëënëdë Egipto, ja fyamilyë Jacob ojts yajtijtë israelitëty. Ko ojts yˈoˈknë Jacob etsë José, ta wiinkpë rey faraon tyëjkë anaˈambë. Tyäˈädë rey tsyëˈkë ja israelitëty mët ko niˈigyë nety jyëmbijnëdë kumëjääw ets kyaj yˈokduˈunˈäjnëdë ja Egipto jäˈäy. Pääty ojts tniˈanaˈamë ets yajtuumbëˈat yajmosëˈattët. Yëˈë ladriyë yajkëëwdë ets mëk tyuundë kamoty tuˈujoty. Ja israelitëty niˈigyë ojts nyimayëdë, oyë Egipto jäˈäy niˈigyë jyatuunëdë axëëk. Ets kom ja rey kyaj tˈoyˈijxy, ta ojts tniˈanaˈamë ets yˈoogët ja diˈib maxuˈunkˈäjtp mixyuˈunk, yëˈëyë jukyˈattëbë kixyuˈunk. ¿Mbawinmaapy wiˈix nyayˈatsëˈkëdë ja israelitëty?
Tuˈugë israelitë toxytyëjk diˈib xëwˈäjt Jokébed ojts dyajmaxuˈunkˈaty tuˈugë myäänguˈunk. Ets parë kyaj yˈoogët, ta ojts dyuˈutsy mä tuˈugë katsy ets tnikeky mä ja mëjnëë diˈib xyëwˈäjtypy Nilo. Míriam, ja tsyëˈë, jaayë ojts tnawëˈëmy parë tˈixäˈäny ti tuun jäjtëp.
Ta ja faraongë nyëëx ojts nyijkxy tsiibë ets ta tˈijxpaty ja katsy. Ko tkuniˈajujptuty, ta tˈijxy tuˈugë maxuˈunk jyantsy yaˈaxy ets ta tpaˈˈayooy. Míriam ta dyajtëëy: “¿Oyëts nëjkx tuˈugë toxytyëjk nˈëxtäˈäy diˈib mdukkuentˈatëp ets yajtsiˈitsëp?”. Ta ja reyë nyëëx yˈatsooy: “Oy”, ta ja Míriam ojts twoy ja tyääk. Ta yaˈˈanmääy ja Jokébed: “Mmënëjkxë tyäˈädë maxuˈunk, kuentˈat ets nmëjuyëp”.
Ko ja uˈunk yeˈky, ta Jokébed ojts tmënëjkxy mä ja reyë nyëëx. Yëˈë diˈib yajˈyaˈk extëmë yˈuˈunk ets txëëwmooy Moisés. Duˈun ojts yeeky pyety extëm tuˈugë prinsipe ets mbäädë nety tmëdaty ti tyim tsojkypy. Per niwindim tkajäˈäytyëgooyë Jyobaa. Moisés nyijäˈäwëbë nety ko yëˈë israelitë, kyaj yˈEgipto jäˈäyëty, per yëˈë wyinˈijx tmëdunäˈänyë Jyobaa.
Ko netyë Moisésë jyëmëjt 40, ta ttukniwinmäˈäyë tpudëkëyaˈanyë kyäjpn. Tëgok, ta tˈijxy ko tuˈugë Egipto jäˈäy ttsiiky tkoxy tuˈugë israelitë diˈib mëduump. Ko duˈunë Moisés tˈijxy, ta tnibëdëˈky ja Egipto jäˈäy ets dyaˈoˈky. Ta net ojts dyuˈtsë ja nyiniˈkx ets ojts ttuknijääxyë jin puˈu. Ko ja rey tnijäˈäwë, ta dyaˈooganyë Moisés, per ta kyeky ets ojts nyijkxy Madián. Jam yëˈë Jyobaa kuentˈäjtë.
“Mëbëjkëngyëjxm ja Moisés [...] kyaj tkupejky es yaˈˈandijët ko myäänkˈatyëty ja reyë nyëëx. Waanë niˈigyë ttsejky es axëëk yajtunët mët ja Diosë jyaˈayëty” (Ebreeʉsʉty 11:24, 25).
