Ilo Ijipt, kar n̦aetan baam̦le eo an Jekob RiIsrael ro. Ãlikin an kar jako Jekob im Josep, ear jino irooj juon bar Pero ak juon kiiñ ekããl. Kiiñ in ear mijak ñe RiIsrael ro renaaj lõñl̦o̦k im kajoorl̦o̦k jãn RiIjipt ro. Kõn men in, ear kõm̦m̦an bwe RiIsrael ro ren aer rũkõm̦akoko. Ear iuun er bwe ren kõm̦m̦an pirõk im ear kõm̦m̦an an l̦ap aer jerbal ilo jikin kallib ko. Meñe ear l̦apl̦o̦k an RiIjipt ro kaeñtaan er, ak men in ear jab bõbrae an RiIsrael ro lõñl̦o̦k. Men in ear kõm̦m̦an an Pero jab m̦õn̦õn̦õ, innem ear kõm̦m̦ane juon kien bwe ren m̦an aolep l̦adik ro nejin RiIsrael ro ilo iien eo rej l̦otak. Kwõmaroñ ke pijaikl̦o̦k an kar RiIsrael ro lukkuun mijak ilo iien in?

Ear wõr juon niñniñ l̦addik nejin juon kõrã in Israel. Etan kõrã in ej Jokebed. Kõnke ear kõn̦aan kõjparok niñniñ in nejin, ear likũti ilowaan juon iep im n̦ooje ilo ujooj ko raetok itõrerein Reba Nile. Ledik eo jein niñniñ in, etan in Miriam, ear pãd ilo juon jikin epaak bwe en lale niñniñ in jatin.

 Ke lio nejin Pero ear itok ñan reba eo bwe en tutu, ear reilo̦k im loe iep eo. Ke kar kõpel̦l̦o̦ke, ear loe juon niñniñ ilowaan ej jañ, im ear bũrom̦õj kake. Innem Miriam ear kajjitõk ippãn im ba: ‘Em̦m̦an ke ñe inaaj pukottok juon kõrã bwe en kõkkaajiririik niñniñ in ñan kwe?’ Ke lio nejin Pero ear uwaak im ba aet, Miriam ear etal im bõktok Jokebed, kõrã eo jinen. Innem lio nejin Pero ear ba ñan Jokebed: ‘Kwõn bõk niñniñ in, lale im kõkkaajiririki, im inaaj kõl̦l̦ã on̦ããn am̦ lale.’

Ke niñniñ in ear rũttol̦o̦k jidik, Jokebed ear bõkl̦o̦ke ñan ippãn lio nejin Pero, eo im ear likũt etan Moses im ear lale ãinwõt ñe lukkuun nejin. Innem Moses ear dik im rũttol̦o̦k ãinwõt juon nejin kiiñ im emaroñ kar tõprak jabdewõt men ear kõn̦aan. Ak Moses ear jab mel̦o̦kl̦o̦k Jeova. Ear jel̦ã bwe ear juon RiIsrael im jab juon RiIjipt, im ear kããlõt bwe enaaj kabuñ ñan Jeova.

Ke ear 40 an Moses iiõ, ear kwal̦o̦k an kõn̦aan jipañ RiIsrael ro. Juon iien ear loe an juon RiIjipt m̦ane juon rũkõm̦akoko jãn Israel, kõn men in ear m̦ane RiIjipt eo ñan mej, innem n̦ooje ãnbwin eo ibul̦õn bok. Ke Pero ear roñ kõn men in, ear kajjioñ in m̦an Moses. Ak Moses ear ko ñan juon jikin etan Midian im Jeova ear lale im kõjparoke ke ear pãd ijin.