Ezɩpt tẽngã pʋgẽ, b wa n boonda a Zakoob zakã neb tɩ Israyɛll neba. A Zakoob ne a Zozɛf kũumã poore, Farawõ a to n sɩng naam dɩɩbo. A ra yɛɛsdame tɩ Israyɛll nebã na n lebga wʋsgo, tɩ b pãngã wa yɩɩd Ezɩpt nebã. Rẽ n so t’a kɩt tɩ b lebg yembse, n modg-b tɩ b maand tãn-koɛɛma, la b tʋmd wʋsg pʋtẽ wã. La baa Ezɩpt nebã sẽn da namsd Israyɛll nebã, Israyɛll nebã sõorã ra paasdame. Woto ra pa noom a Farawõ ye. A yeelame tɩ b kʋ b kom-peels nins sẽn yaa rapã. Israyɛll nebã yɛɛsa wʋsgo!

Israyɛll pag a ye yʋʋr sẽn boond t’a Zokebɛɛd n da tar bi-pɛɛlg sẽn yaa neere, n yaa raoa. A ninga biigã peoog pʋgẽ, n tɩ sagl Nill kʋɩlgẽ wã, sẽn na yɩl tɩ b ra kʋ-a ye. Bi-pɛɛlgã kẽem yalsa yambẽ n na n ges bũmb ning sẽn na n maane. A yʋʋr la a Miryam.

A Farawõ bi-pugl n wa kʋɩlgẽ wã n na n so, n yã peoogã. A mikame tɩ bi-pɛɛlg n da  sag be n yãbda, t’a nimbãaneg yõk-a. A Miryam sok-a lame yaa: ‘M tɩ bool pag t’a wa yẽsem biigã bɩ?’ A Farawõ bi-puglã sakame. A Miryam zoe n tɩ boola a ma a Zokebɛɛde. A Farawõ bi-puglã yeel-a lame yaa: ‘Tall biigã n looge, n tɩ ges a yelle, tɩ m na n yao foo ligdi.’

Biigã sẽn wa n bas bĩisim, a Zokebɛɛd tall-a lame n tɩ kõ a Farawõ bi-puglã. A Farawõ bi-puglã pʋda a yʋʋr t’a Moyiizi, n wub-a wa yẽ meng biiga. A Moyiiz lebga wa a Farawõ biiga, n da tõe n paam a sẽn dat fãa. La a Moyiiz zɩ n yĩm a Zeova yell ye. A ra miime tɩ yẽ pa Ezɩpt ned ye. A yaa Israyɛll neda. A yãka yam n tũ a Zeova.

A Moyiiz sẽn wa n tar yʋʋm 40, a baoome n na n sõng yẽ nebã. Daar a ye, a yãa Ezɩpt rao sẽn pãbd Israyɛll neda, t’a wẽ Ezɩpt raoã n kʋ, n bus-a bĩisrẽ wã. A Farawõ sẽn wa n bãngã, a baoome n na n kʋ a Moyiizi. A Moyiiz zoeeme n kẽng Madiyã tẽngẽ wã. Beenẽ, a Zeova gesa a yelle.