Mu Ingito, vusoko vua Yakomba va vu tantekeyele ku pua vaIsaleli. Mu nima ya ku tsa ca Yakomba na Yosefe, Falao ua muha ua putukile ku sika. Ua kele na vuoma vua vaIsaleli ngecize va puile va kua ngolo ku hiana vakua Ingito. Ngeci ua puisile vaIsaleli vandungo. Ua va kakateyele ku songa vindopi na ku linga vipanga via vingi mu mehia. Vutuhu vakua Ingito va kele na ku va kakateya ku panga cikuma, vaIsaleli kasi va tualeleleho ku lana. Mu ku linga Falao ka vi lemene, ngeci ua tumine ku tsiha vandala vose va vaIsaleli. VaIsaleli va kele na vuoma cikuma, ni vati?

Yokevende umo kaIsaleli ua mpuevo ua kele na kakeke ua yala ua ku vuaha. Linga a mu niunge ua mu hakele mu cikasa na ku mu sueka mu mahongo a ku ndonga ya Nilu. Kaha muanaye ya kakeke ua mpuevo Miliame, ua kele ku hiehi mu ku mu niunga.

Omo muana Falao ua mpuevo ua ile ku ndonga mu ku tana, ua muene cikasa. Mu kati kaco ua uanenemo kakeke a lila, kaha ua mu  vuilile ngozi. Kaha Miliame ua mu hulile ngueni: ‘Citava nji ka ku tondele umo mpuevo a hasa ku ku lelela muana?’ Kaha muana Falao ua handekele ngueni eyo, ngeci Miliame ua ka sanene naye Yokevende. Kaha muana Falao ua mu lekele ngueni: ‘Tambula ou kakeke u ka nji leleleye, kaha nji ka ku fueta.’

Omo muana ua kolele, Yokevende ua mu tualele kuli muana Falao ua mpuevo, kaha ua mu lukile lizina lia Mosesa na ku mu lela ngue muaneni ua ku sema. Mosesa ua kolele ngue muata, kaha ue ku hasele ku kala na viuma viose via tondele. Vunoni Mosesa ka suvile Yehova. Ua tantekeyele ngueni ua puile mpundu kaIsaleli kati mukua Ingito. Kaha ua hanguile ku pangela Yehova.

Mua puisile miaka 40, Mosesa ua tondele ku kuasa vantu veni. Omo ua muene mukua Ingito a veta umo ndungo ua kaIsaleli, Mosesa neni ua tingula mukua Ingito noho ua tsile. Kaha ua sitika civimbi ceni mu museke. Mua vi vuile Falao ua tondele ku tsiha Mosesa. Vunoni Mosesa ua tinine na ku ka kala ku cifuti ca Mindiane. Yehova ua ka mu niungile.