Nochi Jacob ichampoyouaj katli itstoyaj ipan Egipto, kintokaxtijkej israeleuanij. Kema Jacob uan José ya miktoyaj, seyok faraón pejki tlanauatia. Ni yankuik tlanauatijketl kinmakasiyaya israeleuanij pampa tlauel momiakilijtiauiyayaj. Yeka kinchiualtik ma tekitikaj. Kinchiualtiyaya ma kichijchiuakaj ladrillos uan chikauak ma tekitikaj ipan milaj. Maske egiptoeuanij tlauel kintlaijiyouiltiyayaj israeleuanij, inijuantij nojua tlauel momiakilijtiauiyayaj. Nopa faraón tlauel kualanki, yeka tlanauatik ma kinmiktikaj nochi okichpilmej katli sanok tlakajtoyaj. ¡Israeleuanij uelis tlauel momajmatijkej kema kimatkej tlen faraón tlanauatijtoya!

Se siuatl israelejketl katli motokaxtiyaya Jocabed kipixki se yejyektsi pilkonetsi. Ya kinekiyaya kimanauis ipilkone, yeka kitlalik ipan se chikiuitl uan kitlatik akatsajla ipan ueyatl Nilo. María (o Míriam), iikni nopa pilkonetsi, mokajki nechka pampa kinekiyaya kiitas tlake panoskia.

 Faraón iichpoka yajki maltito ipan ueyatl uan kiitak nopa chikiuitl. Kema kitlapok, kiitak se pilkonetsi chokatoya uan kiiknoitak. Uajka María kiiljuik: “¿Tijneki ma nijnotsati se siuatl katli uelis kimokuitlauis ni pilkonetsi?”. Kema nopa ichpokatl kiiljuik ma kinotsati, María kinotsato inana. Faraón iichpoka kiiljuik Jocabed: “Xijuika ni pilokichpiltsi uan xinechchichitili, uan na nimitstlaxtlauis”.

Kema nopa pilokichpiltsi moskaltik, Jocabed kikauilito iichpoka faraón. Ya kitokaxtik Moisés uan kiiskaltik kej ikone. Maske Moisés ueltoskia kipias tlen kinektoskia pampa eliyaya ikone iichpoka faraón, ya amo kema kiilkajki toTeotsij Jehová. Moisés kitlapejpenik kitekipanos Jehová pampa kimatiyaya eliyaya israelejketl, amo egiptoejketl.

Kema Moisés kipixtoya 40 xiuitl, kinejki kinpaleuis israeleuanij. Se tonali, kiitak se egiptoejketl kimakiliyaya se israelejketl uan kimanauito. Chikauak kimakilik nopa egiptoejketl uan kimiktik, uan itlakayo kitlatik xalijtik. Kema faraón kimatki tlen Moisés kichijtoya, tlanauatik ma kimiktikaj. Moisés cholok uan yajki Madián. Nopaya Jehová nojua kimokuitlauik.