Mu Ejipita, mbhuri ya Jakobe yakaguma pa kuzivika inga vaIziraeri. Pasure pokufa ka Jakobe na Jasefa, Faro mupsa wakatanga kutonga. Iyena waithya kuti Vaiziraeri vaizoguma pakuva no simba maningi kupinda vaEjipita. Ngokudaro Faro wakaita kuti vaIziraeri vave varanda. Waivavangirija kuti vaite matijhoro kana zvidhina no kushanda ngo simba rese mu maminda. Pikija kubzinyirihwa kwavaithwa ngo vaEjipita kwaikura, vaIziraeri vaiwanda ngo civerengero. Ngokuti Faro aazivi kuzvidakarira, wakadira mupango wokuti vana vese vorume vo vaIziraeri vabva kubahwa vanodikana kuuraiwa. Mungakwanisa kurangarira kuthya kwakava no vaIziraeri?

Umwe mwanakaji muIziraeri waidanijwa Jokebhedhi wakava no mwana worume waiseja maningi. Kuti amuponese, wakamudira mucitengu zve vocidira mu mbhiripiri mo Murambo Niro. Hambzaji yo cimwana ici, Miriyamu, yakaima padhuzepo kuti ivone zvaizoitika.

Mwana wokaji wa Faro wakaterera kuti aende kosamba mu murambo zve wakavona citengu. Mukati maco mainga no cimwana cecicema zve  wakacizwira urombo. Miriyamu wakati: ‘Ndoenda kodanija mwanakaji angamwisa mwana uwu here?’ Apo mwana wa Faro wakati hina, Miriyamu wakaenda kotora mai wake, Jokebhedhi. Mwana wa Faro wakati kwaari: ‘Torai mwana, undimwisire, ndicazokupoceresa.’

Paainga akura, Jokebhedhi wakamuendesa ka mwana wa Faro, womudanija kuti Mosi zve womurera inga mwana wake kamare. Mosi wakakura inga mwana waamambo zve waikwanisa kuita ciricese caaida. Asi Mosi azivi kukanganwa Jehovha. Iyena waizviziva kuti wainga muIziraeri kamare haiwa muEjipita. Ngo iyo ndava iyena wakakheta kushandira Jehovha.

Pa 40 o makore, Mosi wakasunga kubesera vandhu vake. Paakavona muEjipita ecitaka muIziraeri, Mosi wakatakavo muEjipita wiya mbhera kufa. Mosi wakaviga muviri wake mu musanga. Faro paakazviziva, wakaeja kuuraya Mosi. Asi Mosi wakatizira ku nyika yo vaMidhiani. Paainga ari kondhoyo Jehovha wakamukorodha.