YaandjaJakob oya li ya tseyika nawa muEgipiti kutya yo Aaisraeli. Konima yethimbo sho Jakob naJosef ya si, Farao omupe okwa tameke okupangela. Okwa li a tila, sho Aaisraeli taye ende taya ningi aanankondo ye vule Aaegipiti. Onkene Farao nguka okwe ya ningi aapika. Okwe ya thiminike ya tholome oondhopi noya longe iilonga iidhigu noonkondo momapya. Ihe mpoka pu thike Aaegipiti taya thiminike Aaisraeli, opo pu thike Aaisraeli tayi indjipala. Molwaashoka Farao ka li e shi hokwa, okwa gandja elombwelo kutya uumati awuhe Uuisraeli tawu valwa, nawu dhipagwe. Kala ando wa fa wu wete nkene Aaisraeli ya li ya tila.

Omukulukadhi Omuisraeli gwedhina Jokebed okwa li a mono okanona okamati okawanawa. Opo e ka gamene, okwe ka tula moshimbamba e te ke ka holeka momanenge momulonga gwaNiili. Omumwayina gwako omukadhona, Miriam, okwa li a thikama popepi, a tale shoka tashi ka ningilwa.

Omwanakadhona gwaFarao okwa li e ya okwiiyoga komulonga nokwa mono okatemba hoka. Meni lyako okwa mono mo okahanona  okamati taka lili, nokwa li e ku uvitile ohenda. Miriam okwa pula omwanakadhona gwaFarao a ti: ‘Nandi ku kongele omukulukadhi ngoka ta vulu oku ku yamuthila okanona?’ Omwanakadhona gwaFarao okwa ti eeno, Miriam nokwe mu etele yina, Jokebed. Omwanakadhona gwaFarao okwa lombwele Jokebed a ti: ‘Taamba okanona haka, ka yamuthila ndje notandi ke ku futa.’

Sho okanona ka koko, Jokebed okwe ke eta komwanakadhona gwaFarao, ngoka e ka luku Moses, nokwe ka putudha ongokamwanamati. Moses okwa koko ongomuna gwomukwaniilwa, nokwa li ta vulu okukala e na kehe shimwe shoka a hala. Ihe ka li nando a dhimbwa Jehova. Okwa li a tseya kutya ye mwene Omuisraeli, ihe ke shi Omuegipiti. Moses okwa li a hogolola okulongela Jehova.

Sho Moses e na omimvo 40, okwa tokola oku ka kwathela oshigwana she. Sho a mono Omuegipiti ta dhenge omupika Omuisraeli, Moses okwa dhenge wo Omuegipiti nayi e ta si. Omudhimba gwe okwe gu holeke mehekevi. Farao sho e shi uvu, okwa li a hala okudhipaga Moses. Moses okwa fadhuka po e ta yi kuMidian. Jehova okwe mu sile oshimpwiyu hoka.