THUTO 17
Moshe o Ile a Kgetha go Hlankela Jehofa
Kua Egipita, lapa la Jakobo le ile la tsebja e le Baisiraele. Ka morago ga gore Jakobo le Josefa ba hwe, Farao yo mongwe o ile a buša Egipita. Farao yoo o ile a tšhoga kudu ka gobane Baisiraele ba be ba thoma go ba ba bantši go feta Baegipita, ka gona a thoma go hlakiša Baisiraele. O ile a ba gapeletša go dira ditena le go šoma ga boima mašemong. Eupša le ge Baegipita ba be ba hlakiša Baisiraele, Baisiraele ba be ba no oketšega. Seo se ile sa galefiša Farao, gomme a laela gore masea ka moka a Baisiraele a bašemane a bolawe. Taba ye e ile ya tšhoša Baisiraele, na ga go bjalo?
Bjale go be go na le mosadi yo mongwe wa Moisiraele yoo leina la gagwe e bego e le Jogobede. Mosadi yoo o be a na le ngwana yo mobotse wa mošemane. Ka ge a be a sa nyake gore lesea la gagwe le bolawe, o ile a le tsenya ka gare ga sešegwana ke moka a le uta ka gare ga mahlaka a Nokeng ya Nile. Sesi wa lesea leo e lego Miriamo, o ile a emela kgojana gore a bone seo se tlago go le diragalela.
Morwedi wa Farao o ile a ya nokeng yeo gore a yo hlapa, gomme a bona sešegwana. Ge a se bula, o ile a bona lesea le lla gomme a le kwela bohloko. Miriamo o ile a batamela gomme a botšiša morwedi wa Farao a re: ‘Ke yo go nyakela mosadi yo a ka go hlokomelelago lesea le?’ Morwedi wa Farao o ile a araba ka gore ee, gomme Miriamo a ya a bitša mmagwe e lego Jogobede. Ke moka morwedi wa Farao a botša Jogobede a re: ‘Tšea lesea le o yo ntlhokomelela lona, ke tla go lefa.’
Ge lesea leo le godile, Jogobede o ile a le tliša go morwedi wa Farao. Morwedi wa Farao o ile a le reela leina a re ke Moshe gomme a le dira morwa wa gagwe. Moshe o goletše ka bogošing, ka gona o be a ka ba le dilo ka moka tše a bego a di nyaka. Eupša Moshe ga se a ka a lebala Jehofa. O be a tseba gore ke yena Moisiraele, e sego Moegipita. Ka gona o ile a kgetha go hlankela Jehofa.
Ge Moshe a na le mengwaga e 40, o ile a kgetha go thuša Baisiraele ba gabo. Ka letšatši le lengwe Moshe o ile a bona Moegipita a betha Moisiraele, gomme Moshe a bolaya Moegipita yoo, gomme a mo epela. Ge Farao a ekwa ka taba yeo, o ile a leka go bolaya Moshe. Eupša Moshe a tšhabela nageng ya Midiane. Ge Moshe a le moo, Jehofa o ile a mo hlokomela.
“Ka tumelo Moshe . . . o ile a gana go bitšwa morwa wa morwedi wa Farao, a kgetha go swarwa gampe le setšhaba sa Modimo.” —Baheberu 11:24, 25
You May Also Like
GO ITHUTA KA DISWANTŠHO
Moshe yo Monyenyane o Hweditšwe
Batho ba bararo bao ba lego mo seswantšhong ke bomang? Bala pego ya Beibele go Ekisodo 2 gore o hwetše dikarabo.
MEŠOMO YA BORAPEDI BJA LAPA
Moshe o Golela Egipita
Re ka ithuta’ng go Moshe ge e be e sa le yo monyenyane kua Egipita? Taonelouta mešongwana ye gomme le e ahlaahle le lapa.
MOROKAMI
Moshe e be e le Mang?
Monna yo wa go botega o hlompšha kudu ke Bakriste, Bajuda, Mamoseleme, le ba bangwe. Ke’ng seo o se tsebago ka yena?
DIKARATA TŠA BATHO BA KA BEIBELENG
Karata ya Beibele ya Miriamo
Miriamo o be a bapala seletšwa sefe sa mmino? Ithute ka mo go oketšegilego ka yena ka gore o taoneloute karata ya gagwe ya Beibele.
MEŠOMO YA GO ITHUTA YA BANA
Lapa la Gabo Moshe
Lapa la gabo Moshe le be le hlankela Jehofa ka potego. Ithute ka maina a batho ba gabo.
