Ííjipdi Jéíkab baʼáłchíní éí Ízrel dineʼé biʼdooʼniid. Jéíkab dóó Jóseph jineezná bikʼijįʼ Féro ániidígíí łaʼ nááhodeezʼą́. Éí Ízrel dineʼé ayóó átʼéego Ííjip dineʼé yiláahgo dabidziil daazlı̨́įʼ jiníigo béédzíldzid. Áko Féro éí Ízrel dineʼé naalteʼ danilı̨́įgo áyiilaa. Éí tsé hashtłʼish ádajileʼ áádóó dádaʼakʼehgóó nidaalnishgo yídahoniłkad ńtʼééʼ. Áko Ííjip dineʼé éí díí naanish yéigo yídahoniłkad ndi, tʼóó tséʼédin Ízrel dineʼé tʼóó ahayóí silı̨́ı̨́ʼ. Áko Féro doo bił yáʼátʼéeh da, áádóó ání, Ízrel dineʼé ashiiké nidahachíhígíí bitsʼą́ą́ʼ nidaałtseed. Ízrel dineʼé ayóó átʼéego nídadzisdzííd!

Asdzání Ízrel dineʼé nilı̨́įgo Jákebed wolyéego ashkii tʼóó nizhónígo jishchı̨́. Doo átʼah bidiʼyoolyéeł da jinízingo, awééʼ éí teełtsʼaaʼ yiiʼ sitı̨́įgo Náil tooh nílínígíí tábąąhgi teeł bitahgi nízhdeesʼı̨́ı̨́ʼ. Awééʼ bádí Míriyam éí haa doonííł nízingo tʼáá nízaadę́ę́ʼ haisííd.

Féro bitsiʼ nidoobeeł yiniyé tooh nílínígi níyá, ńtʼééʼ teełtsʼaaʼ yę́ę yiyiiłtsą́. Awééʼ  yichago yiiʼ sitı̨́, áko hoł baa hojoobaʼígo baa tsízdeezkééz. Míriyam áháłní: ‘Asdzáníísh łaʼ hágo bidishní, áko awééʼ ná yaa áhályą́ą doo?’ Áádóó Féro bitsiʼ tʼáá áko hałní. Éí tʼáá hó hamá bił níjítʼáázh, Jákebed. Féro bitsiʼ áháłní: ‘Díí awééʼ nááłtééł, shá baa áhólyą́ą doo, áko nichʼįʼ niʼiishłée doo.’

Awééʼ nineez silı̨́įʼgo Jákebed éí Féro bitsiʼ bichʼįʼ jiníłtı̨́. Áádóó Mózes bee jíízhiʼ, éí tʼáá hó hweʼawééʼ nahalingo jineesą́. Mózes éí Féro biyeʼ jílı̨́įgo jineeyą́ áádóó tʼáá hó jinízinígíí hwee hólǫ́ǫ doo. Ákondi Mózes éí Jiihóvah tʼáadoo yaa yooznah da. Ízrel dineʼé nishłı̨́, doo éí Ííjip dineʼé nishłı̨́į da jinízin. Áko Jiihóvah éí bá naashʼaʼ doo nízin ńtʼééʼ.

Mózes éí dízdiin binááhaigo shidineʼé bíká adeeshwoł niizı̨́ı̨́ʼ. Ííjip diné léiʼ éí Ízrel naalteʼ nilíinii néiniłhałgo yiyiiłtsą́. Áko Ííjip dineʼé nilínę́ę yéigo néidííłhaalgo yiyiisxı̨́. Áádóó hastiin jiisxínę́ę séí biiʼ nízhdeesʼı̨́ı̨́ʼ. Díí Féro bił bééhózingo biniinaa Mózes hodiyeeshxééł niizı̨́ı̨́ʼ. Ákondi Mózes éí Mídiyangóó yóóʼeelwod. Áadi Jiihóvah baa áhályą́ą́ ńtʼééʼ.