Ko Egitu, ombunga ya Jako iihanwa okuti ova Isilayeli. Konyima etyi Jako na Jose vankhia, Ohamba onkhuavo Farao aihimbika okutumina. Akala no woma etyi atala okuti ova Isilayeli ankho vekahi nokukala vali ovanyingi tyipona ova Egitu. Pahe, Farao apake ova Isilayeli moupika. Evekuluminya okulinga omatisolo, nokuundapa unene momapia. Ova Egitu avakuluminya ova Isilayeli okuundapa unene, mahi no ngotyo avatualako nokuliyawisa. Mokonda Farao ketyihandele, atumu okuipaa omalukembe aeho ovakuendye ova Isilayeli. Okuti upondola okusoka oñgeni tyakalesile ova Isilayeli?

Omukai umwe omu Isilayeli utiwa Jokebede ankho wakutula olukembe lumwe oluwa omukuendye. Opo emuhupise emupake mosesu eiholeka momayenga Mondongi Nilu. Miriã omphange yolukembe akala popepi otyo emuyunga.

Omona wa Farao weya mondongi opo elikohe amono osesu. Mokati kosesu avasimo olukembe  lukahi nokulila akala nokankhenda. Miriã apulu okuti: ‘Ndyipondola okukaihana omukai ekutekulileko olukembe olu?’ Etyi omona wa Farao etavela, Miriã akaihana me yae Jokebede. Omona wa Farao apopi okuti: ‘Polapo olukembe olu kelutekule ame ha andyikufete.’

Etyi omona ekula, Jokebede emutuala komona wa Farao. Omona wa Farao emuluku okuti Moisesi akala ngatyina omona wae. Moisesi atekulwa akala ngatyina omona wo hamba, upondola okukala novipuka aviho ahanda. Mahi Moisesi nalumwe alimbilwe Jeova. Ankho utyii okuti omu Isilayeli ha mu Egitu. Aholovona okuumbila Jeova.

Etyi atuukisa omanima 40, Moisesi atokola okukuatesako ovanthu vae. Etyi amona omu Egitu uveta omupika omu Isilayeli, Moisesi avete omu Egitu ankhi. Moisesi aholeka otyivimbi meheke. Etyi Farao etyiiva, ahande okuipaa Moisesi. Mahi Moisesi akahateka no kotyilongo tyitiwa okuti o Midiaa. Mahi Jeova atualako okumutekula.