Jacobpa mirayninkunatam Egipto nacionllapiraq kachkaptinku Israel runakuna nispa suticharurqaku. Jacobwan Josey wañukuptinkum Israel runakunaqa astawan mirarurqa. Chaymi Egipto nacionpi kamachiq faraonqa, Israel runakuna aswan atiyniyuq kananta manchakuspa sirvientenkuna kanankupaqña tantearurqa. Chay kamachiqqa manam Jacobta hinaspa Joseytaqa riqsirqachu, chaymi ladrillota ruwanankupaq hinaspa campopi llamkanankupaq hikutarqa. Chaywanpas aswanraq miraptinkum faraonqa tantearurqa chayllaraq naceq qari wawachakunata wañuchinankupaq. ¡Mayna llakipichá tarikurqaku!

Jocabed sutiyuq Israel warmim kuyayllapaq wawata wachakururqa, hinaspam mana wañuchinankurayku suquskunapa kasqan Nilo mayuman canastapi churaykurqa. Wawachapa panin Mirianñataqmi (Mariañataqmi) pakanpalla qawarqa.

 Faraonpa warmi churinñataqmi chay wawa waqachkaqta tarirurqa, hinaspam llakikururqa. Chaymi Mirianqa tapurqa: “Kay wawata ñuñupusunaykipaq, ¿qayarapamuykimanchu Israel casta warmita?”, nispa. Faraonpa churiñataqmi “arí” nirqa, chaymi Mirianqa wawapa mamallanta qayaramurqa. Paytam faraonpa warmi churin nirqa: “Apay kay wawata hinaspa ñuñupamuway. Ñuqam pagapusqayki”, nispa.

Chay wawacha wiñaruptinmi Jocabedqa faraonpa warmi churinman aparqa. Payñam Moiseswan sutichaspa wawanta hina uywakurqa. Chaynapim Moisesqa kamachiqpa wasinpi suma-sumaq uywasqa wiñarqa, Jehova Diostam ichaqa mana qipancharqachu. Moisesqa yacharqam Israel casta kasqanta, chaymi Jehova Diosllata yupaychananpaq tanteakururqa.

Huk punchawmi Moisesqa 40 watanpi kachkaspan, Israel runata Egipto runa maqachkaqta rikururqa. Moisesñataqmi chay maqaq runata wañurachispan aqupi pamparurqa. Faraonñataqmi chayta yacharuspa Moisesta wañuchiyta munarqa, chayraykum Moisesqa Madian llaqtaman ayqikurqa. Jehova Diosñataqmi paytaqa hinalla yanaparqa.