Yaaiqoobi maate Gibitsete gobbara Israeele yinanni daga ikkitu. Yaiqoobinna Yooseefi reyitu gedensaanni Yooseefi afinokkihu wolu Feriooni moohi. Isi Israeelete manni Gibitsete manna rooranni no yee yaadi. Konni daafira kuni Feriooni Israeelete manni borojje ikkanno gede assi. Isi insa ‘Xuube seekke, hattono gate loosse’ yee qarrisinsa. Gibitsete manni Israeele gadadisinoha ikkirono, Israeelete manni kiiro kayinni roore lexxitu. Feriooni tenne giwino daafira ilamannoha Israeelenniha labballo qaaqquulle baala shinanni gede hajaji. Feriooni hatto yee hajajino daafira, Israeelete manni mageeshshi geeshsha masinoha lawannohe?

Yokaabeedi yinannite Israeelawitte manchora faayyu qaaqqi noose. Ise qaaqqose shinannikki gede gimboolaho worte, Abbayi Lagira haqalu giddo maaxxu. Qaaqqu rodoo Miiriyaami qooxote heedhe ikkannore laˈanni uurritu.

Feriooni beetto biso hayishshidhara laga dirritino widoonni hakkonne gimboola laˈu. Gimboola fantanno woyite giddo qaaqqu no;  qaaqqu wiˈlanni noo daafira marartu. Hakkiinni Miiriyaami ise togo yitu: ‘Qaaqqo awuutte lossitannohe mancho abboheni?’ Feriooni beetto ‘Ee abbie’ yituta Miiriyaami minira hadhe amase Yokaabeedi abbitu. Feriooni beetto Yokaabeedi togo yitu: ‘Woxe eemmahena konne qaaqqo haadhe awuutte lossie.’

Qaaqqu lophe lowoha ikkita, Yokaabeedi haadhe Feriooni beettowa massitu. Feriooni beetto qaaqqoho suˈma Muse yite fushshitu; ise iso umise qaaqqi gede assite lossitino. Muse mootete mine lophino daafira hasiˈrire baala afiˈra dandaanno. Ikkollana Muse Yihowa horo dihawino. Isi Gibitsicha ikkikkinni Israeelaawicha ikkinota afino. Konnira isi Yihowara soqqama doodhino.

Muse 40 diro ikkisita fiixasi kaaˈlate hedi. Mitto barra mittu Gibitsichi mitto Israeelaawicha gananna lae, Muse hakkonne Gibitsicha gane shii. Muse hakkuyi manchi reeshsha shaafu giddo maaxino. Feriooni tenne macciishshe Muse shaara hasi. Muse kayinni Miidiyaami yinanni gobba lubbosi adhe xooqino. Yihowa hakkiicho Muse towaatinosi.