Nanjary nikaihy hoe Israelita ty fianakaviani-Jakoba lafa ta Ejipta tany. Lafa nimaty Jakoba noho Josefa, le nisy Farao hafa nanjary mpanjaka. Nataony andevo ty Israelita, satria natahotsy ie fa nihamatanjaky mandilatsy Ejipsianina reo rozy. Niforosevany hanao boriky noho hiasa mafy an-tonda eny rozy. Fe vomaiky nihamaro ty Israelita arakaraky ty nampijaliani-Ejipsianina reo an-drozy. Nihalani- Farao raha zay, ka nandidy ie hoe tsy maintsy vonoa ze ajà lahilahy Israelita vo nateraky. Mba eritsereto moa ty tahotsini-Israelita reo!

Niteraky anakilahy ty ampela Israelita raiky kaihy hoe Jokebeda. Nataony tanaty sobiky ajà iny, le navoniny tanaty bararata mitiry amy Vavaranoni-Neily teny, soa tsy ho maty. Tsy niala lavitsy Miriama, anabavini-ajà iny, mba hahitany ze raha hiseho.

Lafa nandeha nandro tamy Vavarano iny eny amy zay anakampelani-Farao iny, le nahita ani-sobiky iny. Ajà tomany ro nihitany tanatiny tao, le niferinesany. Nanontany azy Miriama  hoe: ‘Vasa hilako ampela hebreo iha soa hampinono azy?’ Naneky anakampelani-Farao iny, le Jokebeda, azy renin’ajà iny ro nalani- Miriama. Nivolanini-anakampelani-Farao iny ie hoe: ‘Andeso ajà toy, le ampinonò, fa hameako karama iha.’

Lafa nihabe ajà iny, le naterini-Jokebeda tamy anakampelani-Farao iny tany. Mosesy ty anara nameani-anakampelani-Farao iny azy. Nitezany sahala amy anaky naterakiny ie. Sahala anakini-mpanjaka Mosesy tao, ka niazony iaby ze raha nilany. Fe tsy nanalino ani-Jehovah mihintsy Mosesy. Nifily hanompo ani- Jehovah ie, satria hainy fa tsy Ejipsianina ie fa Israelita.

Nanomboky tapa-kevitsy hanampy olo firenena raiky aminy reo Mosesy, tamin’ie 40 tao. Nivangoany marè biby, ohatsy, Ejipsianina raiky nihitany namango andevo Israelita zay, le nimaty. Bakeo navoniny tanaty fasiky ao. Lafa nihaini-Farao raha iny, le neloky biby ie ka ta ho namono ani- Mosesy. Fe nilay amy tany Midianina reo any Mosesy. Nikarakarani-Jehovah soa avao ie tany.