Akxni xlamakgo kʼEgipto, xfamilia Jacob kalilakgapaska israelitas. Akxni Jacob chu José xnikgonita, chatum xasasti faraón tsukulh mapakgsinan. Uma faraón xpekuan xlakata israelitas tlakg lakgtliwakgan xwamakgo nixawa egipcios. Wa xlakata skujni katlawalh. Xafuerza xkamatlawi ladrillos chu palha kskujkgolh kkapukuxtun. Maski egipcios tlakg nitlan xkalikatsinikgo, israelitas tlakg xlhuwamakgo. Xlakata faraón ni lakgatilh uma, mapakgsinalh pi xkamakgnika putum lakgkgawasan tiku aku xlakachinkgonit, pero ni xkamakgnika laktsuman. ¿Lakpuwana la pekuankgolh israelitas?

Chatum israelita xwanikan Jokébed kgalhilh lu stlan kgawasa. Xlakata nitu xtlawanika, wililh kʼakgtum canasta chu matsekgli xlakni tuwan kkgalhtuchokgo Nilo. Míriam, xtala uma skgata, lakatsu tayalh xlakata xʼakxilhli tuku xʼama la.

Xtsumat faraón alh paxa kkgalhtuchokgo chu akxilhli canasta. Anta kcanasta akxilhli  chatum skgata nema xtasama chu lakgalhamalh. Míriam kgalhskilh: “¿Lakaskina nakan putsa chatum puskat tiku nakuentajtlawaniyan?”. Xla wa pi tlan chu Míriam alh tiya xtse. Xtsumat faraón wanilh Jokébed: “Kalipi uma skgata, kakinkuentajtlawani chu akit nakmaskgawiyan”.

Akxni uma kgawasa stakli, Jokébed linilh xtsumat faraón. Xla limapakuwilh Moisés chu makgastakli la xkgawasa. Moisés stakli la chatum príncipe chu tlan xkgalhi putum tuku xlakaskin. Pero putum kilhtamaku lakapastakli Jehová. Moisés xkatsi pi xla israelita xwanit, chu ni egipcio chu laksakli naskujnani Jehová.

Akxni xkgalhi 40 kata, Moisés lakpuwa nakamakgtaya xkachikin. Akgtum kilhtamaku, akxilhli pi chatum egipcio xmakgsnokgma chatum israelita. Akxni akxilhli, Moisés lu tliwakga nikli egipcio asta makgnilh chu matsekgli anta kmuntsiya. Akxni faraón katsilh, xmakgniputun Moisés, pero xla tsalalh chu alh kMadián. Anta Jehová kuentajtlawalh.