Vwẹ Ijipt, a riẹn orua rẹ Jekọp phiyọ ihwo rẹ Izrẹl. Jekọp vẹ Josẹf vwo ghwu nu, a da rhe vwẹ Fero kpokpọ vwo mu. Ihwo rẹ Izrẹl vwo buẹnphiyọ na, oshọ ko mu Fero nana nẹ ayen che vwo ẹgba vrẹ ihwo rẹ Ijipt. Kọyensorọ Fero nana vwọ vwẹ ihwo rẹ Izrẹl vwo ru eviẹn. Ọ gba ayen vwọ ma ikerekpẹn, ọ je gba ayen vwọ wiowian ọgangan vwevunrẹ aghwa. Dede nẹ ihwo rẹ Ijipt gba ihwo rẹ Izrẹl vwọ wiowian ọgangan, jẹ ayen ji buẹnphiyọ. Oma vwerhen Fero kpahen ọnana-a, o de ji urhi nẹ e hwe emeshare rẹ Izrẹl re vwiẹre obọ. Ọnana cha nẹrhẹ oshọ ghini mu ihwo rẹ Izrẹl mamọ!

Aye ọvo, rọ dia ohwo rẹ Izrẹl re se Jokebẹd de vwiẹ ọmọshare oyoyovwin ọvo. O de muo phiyọ akpẹrẹ, o de re sionu vwẹ odi rehẹ orhoma Urhie rẹ Nile. Miriam rọ dia oniọvo rẹ ọmọ na, de mudia akọkọ ọ sa vwọ mrẹ obo re cha phia.

Ọmọtẹ rẹ Fero da rhe họ vwẹ urhie na, ọ da mrẹ akpẹrẹ na. Ọ da mrẹ ọmọboba rọ viẹ  vwẹ evun rọyen, aro rọyen da dọn. Miriam da nọ: ‘Me ra guọnọ aye rọ sa vwẹrote ọmọ na kẹ wẹ?’ Ọmọtẹ na da rhọnvwe, Miriam de re se Jokebẹd rọ dia oni rọyen rhe. Ọmọtẹ rẹ Fero da vuẹ: ‘Mu ọmọ nana, wọ vwẹrote kẹ vwẹ, me cha hwosa kẹ wẹ.’

Ọmọ na vwọ rho te ẹdia, Jokebẹd de muo rhe ọmọtẹ rẹ Fero, o de se nẹ Mosis, ọ da vwẹrote kerẹ ọmọ rọyen. Mosis da rhe dia ọmọ rẹ ovie, kemu kemu rọ guọnọre ọyen o vwo. Mosis kpairoro vrẹ Jihova-a. Ọ riẹnre nẹ ọyen ohwo rẹ Izrẹl, ọ diẹ Ijipt o nurhe-e. O de brorhiẹn rọ vwọ ga Jihova.

Ọke rọ vwọ hẹ ẹgbukpe 40, Mosis de vwo ẹwẹn rọ vwọ chọn ihwo rọyen uko. Mosis vwọ mrẹ ohwo rẹ Ijipt ro shenyẹ ohwo rẹ Izrẹl ọvo, ọ da teyen ohwo rẹ Ijipt na hwe. Mosis de si orivwin na nu vwẹ otọ. Fero vwo nyo kpahọn, ọ da davwẹngba ro vwo hwe Mosis. Ẹkẹvuọvo, Mosis da djẹ kpo Midian. Jihova vwẹrote vwẹ oboyin.