Musi vhe Egipita, muṱa wa Yakobo wo ḓivhiwa sa Vhaisiraele. Musi Yakobo na Yosefa vho no fa, ha thoma u vhusa Farao muswa. O ofha uri Vhaisiraele vha khou vha lushaka lu re na maanḓa u fhira Vhaegipita. Nga zwenezwo, Farao a ita Vhaisiraele dziphuli. A vha kombetshedza uri vha forome zwidina na u shumesa masimuni. Fhedzi naho Vhaegipita vho vha kombetshedza u shumesa, lushaka lwa Vhaisiraele lwo bvela phanḓa lu tshi hula. Zwenezwo a zwo ngo takadza Farao nahone a laedza uri vhatukana vhoṱhe vha Vhaisiraele vhane vha bebwa vha vhulawe. Naa ni a kona u vhona nḓila ye Vhaisiraele vha vha vho tshuwa ngayo?

Mufumakadzi wa Muisiraele ane a pfi Yoxebeta o vha na ṅwana wa u naka wa mutukana. U itela u mu tsireledza, a mu dzhenisa kha manngi nahone a mu dzumba ṱhangani dza Mulambo wa Nili. Khaladzi awe, Miriama, a dzula henefho tsini u itela u vhona uri hu ḓo itea mini.

Ṅwananyana wa Farao a ḓa mulamboni u ṱamba nahone a vhona manngi. Nga ngomu hawo a  vhona ṅwana a tshi khou lila nahone a mu pfela vhuṱungu. Miriama a vhudzisa: ‘Naa ndi nga ya u ni ṱoḓela mufumakadzi ane a nga ni mamisela uyu ṅwana?’ Musi ṅwananyana wa Farao a tshi tenda, Miriama a vhuya na mme awe, Yoxebeta. Ṅwananyana wa Farao a ri khae: ‘Dzhiani hoyu ṅwana, ni mu mamise nahone ndi ḓo ni holela.’

Musi ṅwana o no aluwa, Yoxebeta a mu isa ha ṅwananyana wa Farao, we a mu ṋea dzina ḽa Mushe nahone a mu alusa sa ṅwana wawe. Mushe o aluwa sa mukololo nahone o vha a tshi nga vha na tshiṅwe na tshiṅwe tshine a tshi ṱoḓa. Fhedzi Mushe ho ngo vhuya a hangwa Yehova. O vha a tshi zwi ḓivha uri u Muisiraele, hu si Muegipita. Nahone a khetha u shumela Yehova.

Musi e na miṅwaha ya 40, Mushe a phetha u thusa vhathu vha hawe. Musi a tshi vhona Muegipita a tshi khou rwa phuli ya Muisiraele, Mushe a rwa Muegipita nga maanḓa nahone a fa. Mushe a dzumba tshitumbu muṱavhani. Musi Farao a tshi zwi wanulusa, a ṱoḓa u vhulaya Mushe. Fhedzi Mushe a shavhela shangoni ḽa Midiani. Yehova a mu ṱhogomela henefho.