Gibxxe biittan, Yaaqooba soo asay Israaˈeelata geetettiis. Yaaqoobinne Yooseefi hayqqi simmin, hara Paarooni haariyoogaa doommiis. Israaˈeelati Gibxxetuppe keehi wolqqaamido gishshawu i yayyiis. Hegaa gishshawu, he Paarooni Israaˈeelata aylle oottiis. I eti xuubiyaa medhanaadaaninne deexo oosuwaa oottanaadan giddiis. SHin Gibxxeti Israaˈeelati deexobaa oottanaadan keehi giddikkokka, Israaˈeelatu qooday yaa gujjiis. Paarooni hegaa dosibeenna gishshawu, Israaˈeelati yeliyo attuma naata ubbaa woranaadan azaziis. Israaˈeelati ay keena yayyidaakko qoppana danddayay?

Yokebeedo giyo Israaˈeela maccaasiyaa loˈˈiya attuma naˈaa yelaasu. Maccaasiyaa a ashshanawu keeshiyan yeggada, Nayle SHaafan deˈiya ceeccaa giddon qosaasu. Naˈaa michiyaa Miiriyaama haniyaabaa beˈanawu naˈaappe daro haakkennan takkaasu.

Paaroona naˈiyaa bollaa meecettanawu shaafaa baada keeshiyaa beˈaasu. Keeshiyaa  giddon yeekkiya naˈaa beˈada a naˈawu qarettaasu. Miiriyaama, ‘Neeyyo ha naˈaa xanttanawu maccaasa issinno ehaanawu taani boo?’ yaagaasu. Paaroona naˈiyaa ee, yaagin, Miiriyaama baada ba aayyiyo Yokebeedo ehaasu. Paaroona naˈiyaa o, ‘Ha naˈaa efaada, taayyo xanttashsha; taani neeyyo damoozaa qanxxana’ yaagaasu.

Yokebeeda naˈay gitaa gidin, a Paaroona naˈeessi ehaasu; Paaroona naˈiyaa a Muusa gaada sunttada ba naˈaadan dichaasu. Muusee Paaroona naˈa gididi dicciis; qassi i koyiyo aybanne demmana danddayees. SHin Muusee Yihoowa mule dogibeenna. I Gibxxe biittaa asa gidennan, Israaˈeela asa gidiyoogaa erees. Qassi i Yihoowawu haggaazanawu dooriis.

Muusee bawu layttay 40 gidin, ba asaa maaddanawu qofaa qachiis. I Gibxxe biittaa asa issoy Israaˈeela aylliyaa wadhishin beˈiis; Muusee he Gibxxe bitaniyaa keehi shocin i hayqqiis. Muusee anhaa shafiyaa giddon qottiis. Paarooni hegaa eridi, Muusa woranawu maliis. SHin Muusee Midiyaama biitti baqatiis. Yihooway a yan naagiis.