Ha Ehipto, an pamilya ni Jacob gintawag nga mga Israelita. Kamatay nira Jacob ngan Jose, nagtikang pagmando an usa nga bag-o nga Paraon. Nahadlok hiya kay an mga Israelita mas nagtitikakusog kay han mga Ehiptohanon. Salit gin-uripon niya an mga Israelita. Iya hira ginpwersa nga maghimo hin mga briks ngan ginpatrabaho hin mabug-at ha uma. Pero samtang mas ginmamaltrato hira han mga Ehiptohanon, mas nagdadamu hira. Waray ito maruyagi han Paraon, salit nagsugo hiya nga patayon an ngatanan nga minasus-an nga kalalakin-an nga Israelita. Nahuhunahuna mo ba an duro nga kahadlok han mga Israelita?

An Israelita nga babaye nga hi Jokebed may gwapo nga minasus-an nga lalaki. Basi maproteksyonan, iya iginbutang an iya anak ha basket ngan igintago ha mga tangbo ha Salog Nilo. Ginbinantayan ito han bugto han bata nga hi Miriam, pero medyo apartado la hiya.

Han an anak nga babaye han Paraon kumadto ha salog basi kumarigo, nakita niya an basket. Han gin-abrihan niya ito, nakita niya an  nagtatangis nga minasus-an, ngan nalooy hiya. Hi Miriam nagpakiana: ‘Karuyag mo ba mamiling ako hin babaye nga mag-aataman han bata para ha imo?’ Han naruyag an anak han Paraon, ginkuha ni Miriam an iya nanay, hi Jokebed. An anak han Paraon nagsiring: ‘Dad-a ini nga bata, atamana hiya para ha akon, ngan babaydan ko ikaw.’

Han durodaku na an bata, gindara hiya ni Jokebed ngadto ha anak han Paraon, nga nagngaran ha iya hin Moises ngan nagpadaku ha iya sugad nga kalugaringon nga anak. Nagdaku hi Moises sugad nga prinsipe ngan mahimo unta magkaada han ngatanan nga iya karuyag. Pero waray niya hingalimti hi Jehova. Maaram hiya nga Israelita hiya, diri Ehiptohanon. Ngan ginpili niya nga singbahon hi Jehova.

Han 40 anyos hi Moises, nagdesisyon hiya nga buligan an iya mga igkasi-Israelita. Han makita niya nga ginkakastigo han usa nga Ehiptohanon an usa nga Israelita nga uripon, makusog nga ginbunalan niya an Ehiptohanon salit namatay ito. Gintabonan niya hin tuna an patay. Han mahibaroan ito han Paraon, gin-ikaparatay niya hi Moises. Pero pinalagiw hi Moises ngadto ha Midian. Didto, waray hiya pabay-i ni Jehova.