Taranaka Jakoba nipetraka ta Ezipta, Israelita nikahian̈a iro. Koa fa naty Jakoba ndreky Josefa, nisy Farao vaovao nanjaka tao. Izy navozo tsao Israelita aby io loso matanjaka mandilatra Ezipsianin̈y, ke nataony andevo iro. Niforseny nan̈amboatra biriky maro ndreky nirahiny niasa tany iro. Nahainaro fo Israelita aby io. Nampaneloko Farao raha zen̈y, ke nirahiny nivonen̈a aby tsaiky lelahy teraka jiaby. Misora navozo mare iro Israelita aby io tamy zen̈y!

Nisy man̈angy israelita araiky zay, Jokebeda an̈arany, niteraka tsaiky lelahy araiky zatovo. Tiany harovan̈a tsaiky io, ke nataony tan̈aty antomby, avio nasitriny tamy bararata tamy sisiny Ten̈aranony Neily. Miriama, anabaviny tsaiky io, nidoko narikitry tio nizahazaha izy.

Nisy zanaka Farao man̈angy nandeha niseky tamy ten̈arano io. Hitany antomby io,  ke nibiafiny. Nahinakinaka izy nahita tsaiky nitomoan̈y tan̈aty tao. Ho Miriama: ‘Anao itadiavako man̈angy hampinono tsaiky io?’ Nan̈eky zanaka Farao man̈angy io, ke Miriama nilomoay nangala Jokebeda, mamany tsaiky io. Volan̈iny zanaka Farao io tamy Jokebeda: ‘Indesa tsaiky ty, amia nono izy, fa anao karamaiko.’

Tsaiky io koa fa nahaibe, nateriny Jokebeda tamy zanaka Farao man̈angy io. Nataony Mosesy an̈arany tsaiky io, ke nitariminy mira zanany. Mosesy nety nahazo raha jiaby tiany tamy zen̈y. Kanefa Mosesy tsy nan̈adin̈a Jehovah foeky. Hainy fa izy Israelita fa tsy Ezipsianin̈y. Izy nifidy hanompo Jehovah.

Mosesy koa fa 40 taon̈o, izy tihan̈ampy Israelita aby io. Nisy Ezipsianin̈y namopoko andevo israelita hitany. Nivangoeny Mosesy mare Ezipsianin̈y io, ke naty. Naleviny tan̈aty jia faty io. Raha io koa fa hainy Farao, tiany hivonen̈a Mosesy. Mosesy nilefa ta Midianin̈y tan̈y. Nikarakarainy Jehovah tsara izy tan̈y.