Tu luʼumil Egiptoeʼ kʼaj óoltaʼab u familia Jacob bey israelitaʼobeʼ. Le ka kíim Jacob yéetel Joseeʼ, káaj u gobernar juntúul túumben faraón. Letiʼeʼ sajak kaʼachi tumen le israelitaʼoboʼ tsʼoʼok u maas yaʼabtaloʼob ke le egipcioʼoboʼ. Le oʼolal tu palitsiltoʼob. Tu obligartoʼob u beetoʼob ladrillos yéetel u sen meyajoʼob teʼ kʼáaxoʼ. Kex sen beetaʼab u muʼyajoʼobeʼ seguernaj u sen yaʼabtaloʼob. Faraoneʼ maʼ utschaj tu tʼaaniʼ, le oʼolal tu túuxtaj kíimsbil tuláakal le mejen xiʼipalaloʼob israelitaʼob táant u síijloʼoboʼ. Máans ta tuukul bix úuchik u sajaktal le israelitaʼoboʼ.

Juntúul koʼolel israelita u kʼaabaʼ Jokébedeʼ anchaj juntúul u chaambal, juntúul chan xiʼipal jach jatsʼuts. Utiaʼal u kanáantikeʼ tu tsʼáaj ichil junpʼéel xaakeʼ ka tu taʼakaj ichil le cañaʼob yaan tu jáal le río Nilooʼ. Míriam, u kiik le chaambaloʼ, pʼáat naatsʼ utiaʼal u yilik baʼax kun úuchul.

Ka bin ichkíil u hija faraón teʼ ríooʼ tu yilaj le xaakoʼ. Ichil le xaakoʼ tu yilaj juntúul chaambal táan u yokʼol, ka tu chʼaʼaj óotsilil tiʼ. Míriameʼ tu  yaʼalajtiʼ: ‹¿A kʼáat wa ka xiʼiken in tʼan juntúul koʼolel utiaʼal ka u kanáanttech le chaambaloʼ?›. Letiʼeʼ tu yaʼalajtiʼ maʼalob, ka túun bin Míriam u tʼan u maama le chaambaloʼ. U hija faraoneʼ tu yaʼalaj tiʼ Jokébed: ‹Bis le chaambaloʼ ka a kanáantten, jeʼel in boʼotiktecheʼ›.

Le ka nojochchaj le chan xiʼipaloʼ Jokébedeʼ tu bisaj tiʼ u hija faraón. Letiʼeʼ tu tsʼáaj u kʼaabaʼt Moisés, ka tu nojochkíintaj bey juntúul u hijoeʼ. Moiseseʼ nojochchaj bey juntúul principeeʼ, le oʼolal jeʼel u páajtal u yantal kaʼach tiʼ jeʼel baʼaxak u kʼáateʼ. Chéen baʼaleʼ Moiseseʼ maʼ tu tuʼubsaj Jéeobaiʼ. Letiʼeʼ u yojel maʼ egipcioiʼ, baʼaxeʼ israelita, le oʼolal tu yéeyaj u meyajtik Jéeoba.

Le yaan 40 años tiʼ Moisesoʼ tu chʼaʼtuklaj u yáantik u yéet kaajaloʼob. Junpʼéel kʼiineʼ tu yilaj bix u sen jaʼatsʼal juntúul israelita tumen juntúul egipcio. Moisés túuneʼ tu nóokjatsʼtaj le egipciooʼ ka tu kíimsaj. Ka tsʼoʼokeʼ tu taʼakaj teʼ arenaoʼ. Le ka tu yojéeltaj faraón baʼax úucheʼ taakchaj u kíimsik Moisés, chéen baʼaleʼ letiʼeʼ púutsʼeʼ ka bin tu luʼumil Madián. Le tiaʼan teʼeloʼ kanáantaʼab tumen Jéeobaiʼ.