Lainy gudx Egipto, xfamily Jacob góc laayibu israelitas. Después que Jacob né José goity, stoib faraón gosaló buny mandary. Faraón bidzuibybu que israelitas ñacyibu más nadip que buñ egipcios. Por ngú bunybu que guirá israelitas ñac xomósyibu né ñonyibu dxiin nanaa. Buny mandarybu israelitas nabeʼ basoyáay né ñonyibu dxiin naana ló xaliooyibu. Órni más bunyibu dxiin nanaa, másli bidalyibu. Faraón diti bioladx ngú por ngú buny mandarybu ñaity guirá mbioxguieuyen ni ñal. ¿Bidzuiby israelitas ja?

Per toib buñgonaʼ israelita ni góc laa Jokébed gop toib badaʼyen né par diti nagaity buñ xpadaʼyenbu, goloʼbu badaʼcu lainy toib dzoim né bicachlanbu láani lad guiʼix cueʼ guʼuc Nilo. Míriam biaʼanbu gahxca ronoʼ dzoimcu par diti ñoʼ xi nasaclóo bisanienbu.

Toibtica dzú xiindzap faraón goyeebu góos roʼ guʼuc cú né bibiʼbu toib dzoim. Órni bixalbu  láani bibiʼbu toib badaʼyen ni cayibdxaʼ né binladxbu badaʼyencu. Míriam gonabdiitz láabu: «¿Raniiny looy tzayobi toib buñgonaʼ ni gan láabu la?». Xiindzap faraón gosaguel, ór cú Míriam goycaʼ xinaʼ par gan bisanienbu. Xiindzap faraón gochbu Jokébed: «Goyné badaʼ reʼ né gon láabu né naʼ saguiix looy».

Órni nidxiyencu goniʼs, Jokébed bunycuent láabu xiindzap faraón. Láabu goleʼbu laa nidxiyencu Moisés né bisniʼsbu nidxicu xomod xiimbu. Moisés goniʼsbu xomod xiin faraón né labúu ñapbu nitisi naniiny láabu. Per Moisés dipa bialadxbu Jehová. Moisés gondxich que nacbu israelita diti buñ egipcio, né golúbu nasobbu Jehová.

Órni Moisés gop 40 íz goniiny ñacnébu buñ xcudxbu. Toibtica dzú, bibiʼbu que toib egipcio caguimbu toib israelita. Ór cú Moisés godimbu né bigaitybu egipciocu, né bicachlan Moisés láabu lainy yohx. Órni gon faraón láani, goniiny nagaitybu Moisés, por ngú Moisés bixony né goylésbu toib gudx ni góc laa Madián. Lagarycu Jehová gon láabu.