ISIFUNDO 17
UMose Wakhetha Ukukhonza UJehova
EGibhithe, umndeni kaJakobe wagcina waziwa ngokuthi ama-Israyeli. Ngemva kokushona kukaJakobe noJosefa, indodana kaFaro yaqala ukubusa, nayo yabizwa ngokuthi uFaro. Yayesaba ukuthi ama-Israyeli ayesemaningi futhi eba namandla kunabaseGibhithe. Ngakho uFaro wawenza izigqila ama-Israyeli. Wawaphoqa ukuba enze izitini futhi afukuze emasimini. Kodwa lapho abaseGibhithe bewagqilaza kakhulu, ama-Israyeli ayeba maningi nakakhulu. Ngenxa yokuthi uFaro akakuthandanga lokho, wakhipha umyalo wokuba kubulawe zonke izingane zama-Israyeli ezingabafana lapho zizalwa. Awucabange nje ukuthi ama-Israyeli ayesaba kanjani.
Owesifazane ongumIsrayeli, uJokebedi waba nomntwana omuhle womfana. Ukuze amvikele, wamfaka kubhasikidi wabe esemfihla emhlangeni woMfula iNayile. Udadewabo womfana, uMiriyami, wayecuthe eduze komfula ukuze abone ukuthi kuzokwenzekani.
Indodakazi kaFaro yahamba yayogeza emfuleni yabe isibona ubhasikidi. Phakathi kukabhasikidi yabona umntwana okhalayo yabe isimzwela. UMiriyami wabuza: ‘Ngikubizele owesifazane ozokuncelisela umntwana?’ Lapho indodakazi kaFaro ivuma, uMiriyami wabuya nomama wakhe, uJokebedi. Indodakazi kaFaro yathi: ‘Ngicela uthathe lo mntwana, umnakekele, ngizokukhokhela.’
Lapho umntwana esekhulile, uJokebedi wamletha endodakazini kaFaro, eyaqamba umntwana ngokuthi uMose yabe isimkhulisa njengendodana yayo. UMose wakhula eyinkosana yasebukhosini futhi wayengathola noma yini ayifunayo. Kodwa uMose akamkhohlwanga uJehova. Wayazi ukuthi ungumIsrayeli hhayi umGibhithe. Ngakho, wakhetha ukukhonza uJehova.
Lapho eneminyaka engu-40, uMose wakhetha ukusiza abantu bakubo. Ngesikhathi ebona umGibhithe eshaya umIsrayeli, uMose wamshaya lowo mGibhithe wafa. UMose wabe esefihla isidumbu somGibhithe esihlabathini. Lapho uFaro ezwa lokho, wazama ukumbulala uMose. Kodwa uMose wabalekela ezweni lakwaMidiyani. UJehova wamnakekela.
“Ngokholo uMose . . . wenqaba ukubizwa ngokuthi indodana yendodakazi kaFaro, ekhetha ukuphathwa kabi nabantu bakaNkulunkulu.”—Hebheru 11:24, 25
Okunye Ongase Ukuthande
UKUFUNDA NGEZITHOMBE
Umntwana UMose Uyatholwa
Obani la bantu abasesithombeni? Fundani indaba yeBhayibheli eku-Eksodusi isahluko 2 ukuze nithole ukuthi obani.
IMISEBENZI YOKUKHULEKELA KOMKHAYA
UMose Ukhulela EGibhithe
Yini esingayifunda ngempilo kaMose esakhula eGibhithe? Dawuniloda le misebenzi futhi nixoxe ngayo njengomndeni
INQABAYOKULINDA
Wayengubani UMose?
AmaKristu, amaJuda, amaSulumane nabanye bayihlonipha kakhulu le ndoda ethembekile. Wazini ngaye?
AMAKHADI ABALINGISWA ABASEBHAYIBHELINI
Ikhadi LeBhayibheli LikaMiriyamu
Iyiphi insimbi yomculo ayeyidlala? Funda okwengeziwe ngaye ngokudawuniloda leli khadi leBhayibheli.
IMISEBENZI YOKUTADISHA YEZINGANE
Umndeni Wakubo KaMose
Umndeni wakubo kaMose ukhonza uJehova ngokwethembeka. Funda ukuthi abanye kuthiwa obani.
