Musa ukwo i Midian pi oro 40. Kuca ewok egamu dhaku man enyolo awiya. Nindo moko kinde m’ebekwayu rombe ceng’ini ku got Sinai, eneno lembe moko mi zungo. Yen m’udinyo ubewang’, re eberungere ngo! Saa ma Musa ucoro ceng’ini pi nineno nia pirang’o eberungere ngo, ewinjo dwal moko ulwong’e kud i kind mac, man uyero ire kumae: ‘Musa! Kud icor ceng’ini. Wodh wara cen kud i tiendi, pilembe kaka m’icungo i ie tie ng’om ma leng’.’ Yehova re m’ubino weco i bang’e nikadhu kud i bang’ malaika.

Lworo ugam umaku Musa, e eumo wang’e. Dwalne yero kumae: ‘Aneno masendi mi Juisrael. Abibodhogi kud i Misiri man abiterogi i ng’om ma ber. In re m’ibitelo wi dhanu para man ibiwodhogi kud i Misiri.’ M’umbe jiji, eno uwok ni lembe ma nyen ni Musa!

E Musa upenjo kumae: ‘Abiwok yero ang’o ni dhanu ka gipenja nia ng’a m’uora?’ Mungu udwoko ire kumae: ‘Ibiyero igi nia Yehova, Mungu pa Abraham, Mungu pa Isak, Mungu pa Yakobo re m’uora i beng’wu.’ Musa udok uyero kumae: ‘Dong’ ka dhanune gibiwowinja ngo ke?’ Yehova ugam utimo giranyutha moko pi ninyutho nia ebibedo ku Musa. Eyero ni Musa nia ebol uluth pare i ng’om; saa m’ebolo uluthne, e edoko ni thwol! Kinde ma Musa umaku thwolne ku yibe, e edoko kendo ni uluth. E Yehova uyero ire kumae: ‘Kan itimo udu maeni, gibiyio nia an re m’aori.’

Musa uyero kumae: ‘Ang’eyo weco cuu ngo.’ Yehova ung’olo ire kumae: ‘Abiponji ku lembe m’ibiyero, man abioro umeru ma Harun kara ekonyi.’ Calu ma dong’ Musa ung’eyo nia Yehova ni kude, egam eting’o dhaku pare man awiya pare, e gidok i Misiri.