Moisesajj 40 maraw Madián sat lugaran jakäna. Uka tiemponwa casarasïna, wawanakanirakïna. Mä urojja, ovejanakwa Sinaí qollu jakʼan awatiskäna, ukanwa nakhaskir mä chʼapi ali uñjäna. Janirakiw uka alejj nakhantkänti. Moisesajj jakʼachasïna ukhajja, mä aruw uka alit istʼasïna, akham sasa: ‘¡Moisés! Jan jukʼamp jakʼachasinimti. Wiskhumsa apsusim, taktʼkta uka oraqejj santowa’ sasa. Cheqas Jehová Diosaw mä ángel taypejj Moisesar parlaskäna.

Moisesajj wal sustjasïna, ukatwa ajanup imantasïna. Diosasti saskakïnwa: ‘Israelitanakajj wal tʼaqesisipki. Nayaw Egiptot salvanëjja, mä suma oraqe jupanakar churarakëjja. Ukampis jumaw Egiptot markajar irpsunïta’ sasa. Uk istʼasajja, ¿Moisesajj sustjaspachänti?

Moisesajj akham sasaw Diosar jisktʼäna: ‘¿Khitis khitantam sapjjetani ukhajj kamsäsa?’ sasa. Diosajj sänwa: ‘Abrahán, Isaac, Jacob chachanakan Jehová Diosapaw khitanitu sätawa’ sasa. Moisesasti sarakïnwa: ‘¿Jan istʼapkitani ukasti?’ sasa. Jehová Diosajj nayaw yanapäma sasaw mä señal uñjayäna. ‘Thujrum pampar liwtam’ sänwa. Liwtäna ukhasti, ¡thujrupajj asiruruw tukjjäna! Ukatjja Moisesajj wichʼinkhatwa uka asirur katthapïna, ukatsti mayampiw thujrur tukjjäna. Ukjjarusti Diosajj akham sänwa: ‘Uka milagro lurasajja, nayaw jumar khitsma ukwa uñachtʼayäta’ sasa.

Ukampis Moisesajj akham sänwa: ‘Janiw jaqenak nayraqatan sum parlañ yatkti’ sasa. Jehová Diosajj akham sarakïnwa: ‘Nayaw kuntï parlañamäki uk saskäma. Aarón jilamampiw sarapjjarakïta, jupaw yanaptʼarakïtam’ sasa. Cheqapuniw Jehová Diosajj yanaptʼitani sasaw Moisesajj Egipto markar saräna, esposaparusa wawanakaparus irpasjjarakïnwa.