Di Midian do si Musa tinggal saleleng 40 taon. Disi ma ibana mangoli jala marianakhon. Di sada tingki, laho ma ibana marmahan di jonok ni Dolok Sinai. Diida ibana ramba na marapi, alai ndang matutung ramba i! Tingki manjonok ibana, adong ma soara sian ramba i. Didok ma, ‘Unang jonok ho Musa! Bungka ma solopmi, tano na badia do on.’ Jahowa do na mandok i marhite suru-suruan manang malaikat.

Ala mabiar, ditutup si Musa ma bohina. Dung i didok Jahowa ma, ‘Huida do hasusaan ni bangso Israel. Paluaonku nama nasida sian Mesir. Boanonku ma nasida tu inganan na mansai denggan. Ho do na hupillit mamboan bangsongki kaluar sian Mesir.’ Tontu tarsonggot do si Musa mambege i.

Disungkun si Musa ma, ‘Molo disungkun nasida ise na manuru ahu, boha ma alushu?’ Dialusi Jahowa ma, ‘Paboa ma tu nasida, Jahowa Debata ni si Abraham, si Isak dohot si Jakkob do na manuru ho.’ Dung i didok si Musa ma muse, ‘Boha ma molo ndang ditangihon nasida ahu?’ Dibahen Jahowa ma tanda tu si Musa na patuduhon na urupan ni Jahowa do ibana. Disuru ma si Musa mangalempar tungkotna tu tano. Gabe ulok ma tungkotna i! Tingki ditiop si Musa ihur ni ulok i, mulak ma i muse gabe tungkot. Didok Jahowa ma, ‘On ma tanda na patuduhon Ahu do na manuru ho.’

Didok si Musa ma, ‘Ndang malo ahu mangkatai.’ Marjanji ma Jahowa tu ibana, ‘Hupaboa pe aha na laho sidokkononmu. Husuru pe si Aron mangurupi ho.’ Ala pos roha ni si Musa na didongani Jahowa ibana, diboan ma keluargana mulak muse tu Mesir.