Nag-istar si Moises sa Midian nin 40 taon. Nag-agom siya asin nagkaigwang mga aki. Sarong aldaw, kan pinapasturan niya an saiyang mga karnero harani sa Bukid nin Sinai, may natanaw siyang makangangalas na bagay—sarong tanom na naglalaad pero dai nasusulo! Kan ranihan niya iyan para mas mahiling pa, nakadangog siya nin boses hali sa tanom na nagsasabi: ‘Moises! Dai ka na magrani. Halion mo an saimong sandalyas ta nakatindog ka sa banal na daga.’ Si Jehova an nagtataram paagi sa sarong anghel.

Natakot si Moises kaya tinahuban niya an saiyang lalawgon. * An boses nagsabi: ‘Nahiling ko an pagsakit kan mga Israelita. Ililigtas ko sinda sa mga Ehipsiyo tapos dadarahon ko sinda sa sarong magayon na lugar. Ika an isusugo ko para iluwas sinda sa Ehipto.’ Sa hiling mo, ikinabigla daw iyan ni Moises?

Naghapot si Moises: ‘Ano an sasabihon ko pag hinapot ninda ako kun siisay an nagsugo sako?’ Nagsimbag an Diyos: ‘Sabihon mo sainda na an nagsugo saimo iyo si Jehova, an Diyos ni Abraham, ni Isaac, asin ni Jacob.’ Sinabi pa ni Moises: ‘Pa’no kun dai sinda magtubod sako?’ Tinawan ni Jehova si Moises nin patunay na tatabangan Niya ini. Sinabihan niya si Moises na iapon sa daga an sugkod kaini. Nagin halas an sugkod! Kan kaputan ni Moises an halas sa ikog, nagin sugkod giraray iyan. Nagsabi si Jehova: ‘Pag ginibo mo an milagrong ini, papatunayan kaiyan na ako an nagsugo saimo.’

Sinabi ni Moises: ‘Maluya akong magtaram.’ Nangako si Jehova sa saiya: ‘Itutukdo ko sa saimo kun ano an sasabihon mo, tapos isusugo ko an saimong tugang na si Aaron para tabangan ka.’ Dahil aram na ni Moises na tatabangan siya ni Jehova, iniba niya sa Ehipto an agom niya asin mga aki.