De Moses lebt jetzt scho 40 Jahr z Midian. I de Zwüscheziit het er ghürate und isch Papi worde. Einisch isch er am Berg Sinai am Schaf Hüete. Da gseht er öppis Komischs: en Busch mit Dorne, wo brennt, aber er verbrennt nid. De Moses wett das gnauer go aluege. Ufs Mal ghört er e Stimm us em Busch use säge: «Moses, chumm nüm nöcher. Zieh dini Sandale ab, wil du stahsch uf heiligem Bode.» Es isch Jehova, wo dur en Engel redt.

De Moses chunnt Angscht über und verdeckt sis Gsicht. D Stimm seit: «Ich ha gseh, wie schlecht dass es de Israelite gaht. Drum tue ich si us Ägypte rette und bringe si in es guets Land. Und ich ha dich usgwählt, dass du mis Volk us Ägypte use bringsch.» Meinsch au, dass de Moses da überrascht isch?

De Moses fragt: «Was söll ich denn em Volk säge, wenn si fraged, wer mich schickt?» Gott seit: «Säg ihne, dass Jehova, de Gott vom Abraham, vom Isaak und vom Jakob, dich schickt.» Da fragt de Moses: «Aber was isch denn, wenn si nid uf mich losed?» Jehova bewiist em Moses, dass er ihm cha helfe. Für das söll de Moses sin Stab uf de Bode werfe. Da wird us dem Stab e Schlange. Wo de Moses d Schlange am Schwanz packt, wird si wider zumene Stab. Jehova seit: «Wenn du ihne das Wunder zeigsch, isch das en Bewiis, dass ich dich gschickt ha.»

De Moses seit: «Ich cha aber nid guet rede.» Jehova verspricht ihm: «Ich säge dir denn, was du säge söllsch. Und nimm din Brüeder, de Aaron, mit, dass er dir cha helfe.» Jetzt isch sich de Moses ganz sicher, dass Jehova ihm hilft. Drum macht er sich mit sinere Familie uf de Weg uf Ägypte.