Kepiashi Moisés chaa Madián soʼu 40 juya. Kaʼwayuuseshi otta kachonshi nia chayaa. Soʼu wanee kaʼi, chajachi nia arüleejüin naʼanneetse süʼütpaʼa tü uuchikat Sinaí, niʼraka wanee kasa chuwatüin. Chuwatüsü suuʼulia wanee wunuʼu, ¡nnojotpejeʼe jotuin shia! Wanaa sümaa nürütkaain Moisés sünainmüin, susoutaka wanee pütchi eejee suuʼulia tü wunuʼukot sünain maa: «¡Moisés! Nnojo pürütkaain. Paakata püsapaatse, süka wulein tü mma waraitakalü aaʼu pia». Nia Jeʼwaa asoutaka nümüin nükajee wanee aapiee.

Mmotkalaka Moisés, nuunjulaka nuʼupünaa. Sümaka tü pütchikat nümüin: «Teʼrüin müliain maʼin na israeliitakana. Toʼtteʼerüinjana naya noulia na egipciokana, taapajatü namüin wanee mma anasü. Piainjachi kamaaka naya Egiptojee». ¿Ponusüche naaʼin Moisés tia saaʼin pümüin?

«¿Jameerü tanüiki nasakirüle taya sünain jaralin chi kaluwataalakai taya?», nümaka Moisés. Nusoutaka Maleiwa: «Püma namüin nuluwataalain pia Jeʼwaa, chi Nümaleiwasekai Abraham, chi Nümaleiwasekai Isaac otta chi Nümaleiwasekai Jacob». Nusoutaka Moisés: «¿Jama nnojoliire jaa namüin tamüin?». Niiʼiyataka Jeʼwaa wanee shiyaawase süpüla nütüjaain saaʼu Moisés nükaaliinjainjachin nia. «Pujuta türa waraarat pajapuluʼukat», nümaka Maleiwa. Shiasaʼa nujutapa shia, ¡wüijaaka tü waraaratkat! Naapaaka Moisés tü wüikat süka süsi, wunuʼujaaka shia süchikuaʼa. «Paainjapa tia suʼupala wayuu, ayaawatüneechi aaʼu taluwataalain pia», nümaka Jeʼwaa nümüin.

«Isasü tachiki tü tanüikinjatkat», nümaka Moisés nümüin Jeʼwaa. Nusoutaka Jeʼwaa: «Taküjeerü pümüin tü pünüikinjatkat otta tajüteechi pümaa Aarón, chi puwalakai, nükaaliinjeechi pia». Süka nütüjaaitpain saaʼu Moisés nükaaliinjainjachin nia Jeʼwaa, niitaaka nüchikuaʼa Egiptomüin sümaa nuʼwayuuse otta nüchonnii.