Moses wa turire moMidian oure wozombura 40. Eye wa kupa na hara ovanatje. Eyuva rimwe ngunda ama tjevere ozonḓu popezu nOndundu Sinai, eye wa muna otjiṋa otjihimise. Otjihwa tja ri atja yaka omuriro posiya kaatji pi! Indu Moses tja ya popezu okukatara kutja omena ratjike, eye wa zuva eraka okuza motjihwa nda tja: ‘Moses! O ryama popezu. Hukura ozongaku mena rokutja wa kurama poruveze oruyapuke.’ Ya ri Jehova ngwaa hungire okupitira momuengeli.

Moses wa ri ama tira, okutja eye wa kutjira omurungu we. Eraka ra tja: ‘Ami mba muna omauzeu wOvaisrael. Ami me ve yama kOvaengipte neve eta mehi ewa. Oove ngu mo hongorere otjiwaṋa tjandje okutjipitisa moEngipte.’ Otjiṋa hi mape ya tja himisa Moses nu, katjiperi?

Moses wa pura na tja: ‘Ovandu tji ve ndji pura kutja ouṋe ngwe ndji hindi, hi zire vi?’ Mukuru we mu zira na tja: ‘Ve raera kutja Muhona Ndjambi waAbraham, Ndjambi waIsak na Ndjambi waJakob ongwe ku hindi.’ Okuzambo Moses wa tja: ‘Nu otjiwaṋa tji tji hi nokupuratena ku ami hi tjite vi?’ Jehova wa yandja otjiraisiro ku Moses tjokutja Me mu vatere. Eye wa raera Moses kutja nga yumbe okati ke pehi. Okuzambo okati katjituka onyoka! Indu Moses tje i kambura komutjira, oyo ya rira okati rukwao. Jehova wa tja: ‘Tji wa tjiti otjihimise hi, owo mave utu okukambura kutja owami ngu mbe ku hindi.’

Moses wa tja: ‘Ami kawami omuhungire omuwa.’ Jehova we mu kwizikira na tja: ‘Ami me ku raere oviṋa avihe mbi mo sokuhungira nu me hindi erumbi roye Aaron puna ove kutja me ku vatere.’ Mena rokutja aa tjiwa kutja Jehova u ri puna ye, Moses wa toora omukazendu we novazandu ve na yaruka koEngipte.